Åtvarar mot tjuvar under VM-fest

Frende Forsikring åtvarar i ei pressemelding om auka risiko for tjuveri når mange samlar seg for å sjå Noreg spela VM-kvartfinale mot England laurdag kveld.

Ifylgje forsikringsselskapet har talet på tjuveri auka etter kvart som Noreg har spela seg vidare i meisterskapen. Skadesjef for reise, Kathrine Kleppestø, seier at store folkemengder, jubel og høg stemning gjev spelerom for tjuvar.

Ho rår alle til å ha mobil og lommebok i lukka lomme eller veske, ikkje leggja verdisaker på bordet og vera særleg merksame når det vert jubel etter skåringar. Frende peikar på storskjermarrangement, pubar, uteserveringar, kollektivtransport og andre samlingsplassar som arenaer der risikoen er størst.