Altaposten: Nettavisen publiserte skatteopplysningane til over 300.000

Skattelistene som fleire avisar i Amedia-konsernet, inkludert riksavisa Nettavisen, publiserte då skattelistene vart offentleggjorde 3. desember, viste skatteinformasjon om 301.673 personar. Det vil seia alle i Noreg med meir enn 1 million kroner i inntekt, skriv Altaposten.

Pressa får skattelistene på førehand og kan ut frå journalistiske vurderingar publisera enkeltpersonars opplysningar der det er interessant for allmenta. Skattestyresmaktene har praktisert ei grense på inntil 100 personar på slike topplister. Reglane frå Skattedirektoratet må media signera på.

– Kort fortalt var dette ein systemfeil som ikkje vart fanga opp i ein hektisk periode med mange skattesaker, seier Nettavisen-redaktør Gunnar Stavrum til Altaposten.

Han seier feilen vart retta med ein gong, og at publiseringa er hans ansvar som redaktør.

– Det var på ingen måte noko medvite brot på reglane. Det er menneskeleg å gjera feil, og vi kjem til å skjerpa rutinane ved neste høve, skriv Stavrum.

Ei rekke lokalaviser i Amedia publiserte også for omfattande skattelister. Fleire redaktørar peikar på eit problem i Amedia-systemet.

Amedia ønskjer ikkje å kommentera publiseringane, men viser til redaktørane. Konsernet svarer likevel at den tekniske moglegheita til å laga omfattande topplister vart deaktivert i systema deira då dei vart merksame på saka, og at dei gjer tiltak for å hindra gjentaking.

(©NPK)