Aldri før har så mange unge døypt seg

Så mange som 1.008 ungdommar mellom 14 og 15 år døypte seg i Den norske kyrkja i fjor. Det er ny rekord.

– Vi reknar med at dåpstala vil auke sidan færre blir døypte som spedbarn, seier kommunikasjonsdirektør Ingeborg Dybvig ved Kyrkjerådet til Framtida.no.

Dåp i tenåra og i samband med konfirmasjonstida har i hovudsak vore eit by-fenomen, men skilja mellom bygd og by og landsdelar blir stadig viska ut, ifølgje Dybvig.

Biskop i Bjørgvin, Halvor Nordhaug, er glad for at fleire av dei som ikkje er døypte som barn ønskjer å døype seg som ungdommar.

– Det viser at det framleis er ei stor openheit blant unge for ei kristen tru, seier han på telefon til Framtida.no. Biskopen meiner unge i dag er både modige og opne for trua på ein annan måte enn ein kunne sjå tidlegare.

Biskopen seier at Kyrkja også pleier å ta omsyn ved å leggje til rette for ein meir privat dåp for dei som ønskjer det.