15. april startar bålforbodet

– Sjølv om det er kjent for å vera vått på Vestlandet, har me tørre periodar her også – og då skal det ikkje så mykje til før det tek fyr. Det er difor det i bålforbodsperioden i utgangspunktet ikkje er lov å tenne opp bål, eingongsgrill eller bålpanne i skog og utmark, seier Roy Andre Solvåg-Hellevang, som leier førebyggjande avdeling i Sunnfjord kommune og er stadfortredande brannsjef.

Unnataka frå forbodet er nemleg fleire påpeiker han, og understrekar samstundes at ein uansett alltid må vise aktsemd og vera sikker på at bruken av eld er forsvarleg.

I utmark er det til dømes lov å tenne opp eit lite kaffi- eller grillbål, dersom det er openbert at det ikkje kan begynne å brenne der, eller at elden ikkje kan spreie seg.

– I praksis kan det bety at dersom det har vore fjorten dagar med kraftig regn og marka er gjennomvåt, så kan du tenne eit lite bål den første dagen det er opplett. Ein må jo bruke skjønn oppi det heile, seier Solvåg-Hellevang til Nynorsk pressekontor.

Det er alltid den som tenner opp og brenner bålet som har ansvaret for brannsikkerheita. Bålet skal heller aldri vera større enn at du har kontroll og kan sløkkje det.

Under bålforbodet kan du også tenne bål på tilrettelagde bålplassar der det ikkje er brennbart underlag:

– Ein bør uansett alltid sørge for å ha med seg nok vatn til å sløkkje med, og ein må heller aldri gå frå eit bål. Brukar du eingongsgrill, bør du sette han på eit underlag som ikkje er brennbart, slik som berg eller stein, rår han.

– Når du er ferdig, skal grillen kastast i søppelspann for grill og kol. Om du kastar eingongsgrillen i vanleg søppel, må du vente til du er heilt sikker på at grillen er kald.

Uansett årstid, er det alltid forbode å brenne plast, bygningsmateriale og anna søppel, og ein må også alltid ta omsyn til skogbrannfare og vind.

Det gjer folk jamt over, seier Solvåg-Hellevang:

– Folk er generelt flinke til å utvise aktsemd, så me har ikkje mange utrykkingar forårsaka av brot på bålforbodet. Det er berre heilt unntaksvis. Folk flest er bevisste på kor fort det kan ta fyr.

Bålforbodet er heimla i Forskrift om brannforebygging og blir forvalta av Direktoratet for samfunnstryggleik og beredskap. Forbodet gjeld ikkje innmark. Det betyr til dømes at du kan grille når og så mykje du vil i din eigen hage.

(©NPK)