Føre var om kapasitet for syning av avdøde

– Ved to av sjukeheimane i Kvam, Toloheimen og Øysteseheimen, er det bårerom som kan nyttast ved syning av avdøde.

Det skriv helse- og omsorgssjef Åslaug Bøhn Botnen i eit svar til leiar i seksjon for samhandling ved Haukeland universitetssjukehus, Grete Lill Hjartnes. Ho ville vita om kommunen har eit tilbod om ikkje sjukehuset kan tilby syning, og om gravferdsbyrå kan frakta dei avlidne til syning i kommunen.

Botnen opplyser at også pasientrom kan nyttast til syning. Det er ikkje kjølerom ved sjukeheimane. Men helse- og omsorgssjefen har vore i dialog med kyrkjeverja, som melder at det er bårerom i fire kyrkjer. Kapasiteten på kjøl er 12–13 kister.