Stengjer kaien for trafikk

Kaien i Norheimsund vert stengd for bilar frå klokka 10.30 torsdag.

Årsaka er Hjartebank-konserten i regi av Sparebanken vest torsdag kveld. Frå det nemnde tidspunktet vert også busshaldeplassen flytta til bussplassen ved Norheimsund skule og bedehuset.

Marknadsrådgjevar Lars Endre Tholo i Sparebanken vest oppmodar folk som har bilen parkert på kaien, om å flytta den før stenginga i morgon. Arrangøren kjem til å leggja lappar på bilane i kveld for å gje eigarane ei påminning om det som skal skje.

Tholo seier det er tinga om lag tusen billettar til arrangementet, og reknar med at nokre hundre til kjem til å koma. Ettersom arrangementet vert utandørs på torget, treng ein ikkje billett for å få plass. Tholo oppmodar gjestene om å parkera utanfor sentrum, til dømes ved meieritomta, rådhuset og skulen.

Fylkesvegen gjennom Grova vert open under konserten, og eigne trafikkvakter er hyra inn for å sjå til at alt går greitt for seg, fortel Tholo.

Rigginga i konsertområdet tek så smått til klokka 16.30 i ettermiddag.