No er det Tysnesfest som må avlyse

Både Village People, Bjørn Eidsvåg, Hellbillias, Highasakite og Tix skulle ha vore å høyre på Tysnesfest i juli, men no kastar festivalen inn handkleet.

– Vi har dvelt litt med dette ei stund no, seier dagleg leiar for Tysnesfest, Øystein Vaage, til BA måndag morgon.

– Og det blir rett og slett ikkje mogleg å avvikle Tysnesfest i år. Camp er umogleg, båthamna er umogleg og i ein by som Bergen kan du kanskje køyre fire kohortar med 200 menneske i kvar, men då må du ha like mange utgangar og inngangar og det får vi ikkje til her. Dessverre. Vi er veldig lei oss, men vi kjem endå sterkare tilbake i 2022.

Artikkelen held fram under annonsen.

Tysnesfest blir rekna som ein av Vestlandets største festivalar, og på artistlista stod mellom anna Village People, Bjørn Eidsvåg, Hjerteslag, Hellbillies, Kapteinen, Vinskvetten, Highasakite og Tix. Årets festival skulle vore arrangert 7. til 11. juli.

Men no føyer festivalen seg til ei trist liste som stadig blir utvida, over festivalar som også i 2021 må koronaavlyse – blant dei Tons of Rock, Øya, OverOslo, Stavernfestivalen og Dansefestivalen i Sel.

(©NPK)