Jon Fosse. Foto: Beate Haugtrø / NPK

Fosse nominert til Bookerprisen

Jon Fosse kan vinne Den internasjonale Bookerprisen for siste band i romanserien Septologien.

Det tredje og avsluttande bandet i verket, «Eit nytt namn», kom ut i haust. Fosse fekk nyleg kritikarprisen her heime for boka.

Den internasjonale Bookerprisen er ein av verdas mest prestisjefylte litterære prisar og blir delt ut til den beste skjønnlitterære boka omsett til engelsk. Prisen er på 60.000 pund, opplyser Fosses forlag, Samlaget.

Artikkelen held fram under annonsen.

Fosse var også nominert til prisen for band ein av Septologien i 2020.

– Eg er overraska og glad over nominasjonen. Lista over dei nominerte til prisen er imponerande, seier Fosse.

Septologien er eit suggererande og storslått romanverk om kva kunst er, om Gud, alkoholisme, vennskap og tida som går. Det handlar om døden, men òg om kva det vil seie å vere i livet, oppsummerer forlaget.

Verket er sett saman av dei tre bøkene «Det andre namnet», «Eg er ein annan» og «Eit nytt namn».

(©NPK)