Festival hadde overskot i fjor

Bygdalarm gjekk med 173 928 kroner i overskot i 2025. Det syner årsmeldinga og årsrekneskapen for festivalen, som er delt med Kvam herad.

Driftsinntektene enda på 5,13 millionar kroner, ned frå 5,65 millionar året før. Samstundes var driftskostnadene på 5,06 millionar kroner. Driftsresultatet vart dermed 66 253 kroner, medan finanspostane drog årsresultatet opp til 173.928 kroner.

Festivalen hadde 4,11 millionar kroner i salsinntekter i 2025. Av dette stamma 2,68 millionar kroner frå billettsal, medan sal av mat, drikke og reklameartiklar utgjorde 1,44 millionar kroner. Tilskota gjekk ned frå 960 000 kroner i 2024 til 585 000 kroner i 2025.

Bygdalarm skipa i fjor til mellom anna hovudfestivalen i Norheimsund, Badnalarm, Bygdacruise i samarbeid med «Litteraturbåten Epos», frivilligfest og to julemarknader. I tillegg vart det arrangert bingo og loddsal til inntekt for Sjukehusklovnene.

Eigenkapitalen i Bygdalarm var ved årsskiftet på 2,61 millionar kroner.