Publisert 30. mars 2019 kl. 17.18. Oppdatert 30. mars 2019 kl. 21.50.

Børven avgjorde mot Brann


Torgeir Børven vart avgjerande mot gamleklubben.
Fotballspelaren frå Øystese skåra både det andre og det tredje målet i 3-2-sigeren mot Brann på Skagerak arena i ettermiddag. Vebjørn Hoff stod bak det fyrste. Vito Wormgoor gav Brann leiinga, før dei tre Odd-måla kom, før Wormgoor reduserte på straffespark.
- Ja, kvifor ikkje? seier Børven til VG når avisa spør om han vil kjempa om toppskårartittelen.
- Eg har sagt at eg skal ha 15 målpoeng. Minst ti av dei skal vera mål, seier kvemmingen, som fortel at han har hatt ein god vinter og ikkje har stått over ei einaste treningsøkt.
Børven vart seld frå Brann til Odd før fjorårssesongen, etter eit opphald i Nederland som vart prega av skadevanskar. I 2009 skåra han sitt fyrste mål i den øvste divisjonen for Odd på bortebane mot nettopp Brann.