Sure agurkar og rotne tomatar i Hardanger

31. august hadde kommentator i BT, Eirin Eikefjord, eit skråblikk på den politiske stoda i Ullensvang kommune. Denne teksten har fått stått uimotsagt i heile valkampen, men no er valet over og det er på tide med ei oppsummering.

Først må ein retta opp i Eikefjord sine geografikunnskapar. Det er ikkje ringen rundt Sørfjorden som skal samlast til eitt rike. Ullensvang kommune har like lang strandline vestover med utsikt mot resten av verda. På gode dagar kan me til og med sjå toppen av Gullfjellet om det er eit poeng. Det er ikkje berre Eikefjord som manglar denne kunnskapen om at me har naboar i vest. Dette kom også fram i eit ordskifte om badeanlegg, der Jondal kommune vart skulda for å ha økonomiske forpliktingar til Kvam i høve bygging av badeland. Ingebjørn Bleidvin spør retorisk kva glede innbyggjarane i Ullensvang har av eit basseng i Øystese. For mange av oss, Bleidvin, er vegen like kort til Øystese som til Odda. For mange av oss er det til og med like greitt å reisa til Voss. Ullensvang kommune er ikkje berre Sørfjorden, der me ikkje ser anna enn kvarandre frå bassengkanten. Ullensvang skal vera ein god lagspelar for heile regionen vår, nett som dei gamle kommunane våre òg var.

Senterpartiet sin ordførarkandidat har blitt møtt med argument om korleis ho kan vera ordførar i ein kommune ho eigentleg var imot? Der ho ikkje ein gong er samd i namnet? Til det er å seia at Senterpartiet følgjer demokratiske prinsipp og går vidare i den røynda som er. Me har ikkje forlanga omkamp når det ikkje har blitt som me har ønskt. Me har berre ønskt oss eit spel med fleire små og raske spelarar, heller enn få store og tunge. Likevel greier me fint å tilpassa oss den nye spelestilen.

Som Eikefjord påpeikar har også Senterpartiet sine skamplettar, og skulenedleggingar er ikkje bra. Ekspertane har meint at skulenedleggingane har vore økonomisk naudsynte, men dei har kosta Senterpartiet både stemmer, medlemmer og stygge striper i lakken. Om Odda hadde teke same opprydding i sin skulestruktur, hadde det nok kosta Arbeidarpartiet der det same. Spørsmålet blir om det er partiomsynet som gjer at Tyssedal skule lever? Avstanden til Odda er kort og det er god plass på Odda barneskule.

Eirin Eikefjord seier òg at Odda har mest å tapa økonomisk på samanslåinga, men eg lurar på kvar ho tek det ifrå? Jondal går inn i nye kommunen med ei gjeld på 65 100 kroner pr. innbyggjar. I gamle Ullensvang er gjelda 50 700 kroner pr. hovud, medan kvar oddabu skuldar 84 400 kroner. Jondal har ei inntekt pr. innbyggjar på 145 400 kroner, i Ullensvang 119 500 kroner og Odda 133 600 kroner. Verdiane kommunane har i kraftselskap, slår heller ikkje heldig ut for Odda: Jondal har 69 000 kroner pr. innbyggjar, Ullensvang har 28 000 kroner og Odda har 11 000 kroner pr. innbyggjar.

Ein ting Eikefjord har rett i, er at nokon vil sjå framover, medan andre er meir opptekne av det som var. På lista over kommunestyrerepresentantane til Arbeidarpartiet er 11 av 14 oddingar. Dei klorar seg fast til det bastante Ap-regimet dei er vane med. Eikefjord avsluttar kommentaren sin med å seia at Arbeidarpartiet vil ha brureferd i Hardanger, medan det er gravferdsstemning i dei gamle senterpartibygdene. Det er ikkje rart at Arbeidarpartiet går inn for tvangsekteskap når kommunestyregruppa deira har ein snittalder på 50 og 11 av 14 representantar er menn. Roald Aga Haug, du omtala Senterpartiet som sure agurkar, eg håpar laget ditt ikkje består av rotne tomatar. Eg gler meg til å ta fatt på min første periode som kommunerepresentant, fødd i eit anna tusenår enn mine medrepresentantar.

Og Eirin Eikefjord, ikkje framstill oss som stereotypar og bygdetullingar. Vil du at Vestlandet skal fungera som region og at Bergen skal visa på kartet, er me avhengige av at distrikta fungerer, også Hardanger.

Tiril Eiken,

kommunestyrerepresentant for Senterpartiet i Ullensvang Kommune