Ap soleklar vinnar i skulevalet

45,9 prosent av elevane ved Kvam vidaregåande skule røysta Ap i årets skuleval.
Det syner tal som Norsk senter for forskningsdata publiserte onsdag kveld.
Partiet har ein auke på 20,7 prosentpoeng samanlikna med skulevalet i 2017.
Nest størst er Sp med 26,8 prosent (- 4,5). MDG er tredje største parti med 8,1 prosent (+1,2).

SV har den største nedgangen sidan 2017. Partiet fekk 1,9 prosent, ein nedgang på 10,3 prosentpoeng.
Elles gjekk Raudt ned med 2,7 prosentpoeng, KrF ned med 0,3, V ned med 0,7, H opp med 0,1 og Frp ned med 3,2. Piratpartiet fekk 1 prosent, Noregs kommunistiske parti (NKP) 1,9 og Liberalistane 0,5.
229 av 231 elevar røysta på skulen, men berre 209 av røystene var gyldige. 7 røysta blankt.

På Framnes kristne vidaregåande skule er – kanskje ikkje overraskande – Kristeleg folkeparti skulevalvinnaren, med 26,4 prosent. Sigeren kjem likevel med ein bismak: Oppslutninga har minka med 8,2 prosentpoeng på skulen samanlikna med 2017.
Også på Framnes gjer Ap det bra. Partiet gjer det nest best, med 20,1 prosent oppslutning (+ 9,3). 
Høgre er tredje største, med 17,6 prosent (+ 1,3).
Raudt hadde inga endring i oppslutning på Framnes, SV gjekk opp med 2,9, Sp gjekk ned med 4,6, MDG gjekk opp med 7,9, V gjekk ned med 3,4 og Frp gjekk ned med 2,5.
Elles fekk Piratpartiet 2,9 prosent, NKP 2,5, Pensjonistpartiet 1,7, Partiet dei kristne 1,3, Liberalistane 0,4 og Folkeaksjonen Nei til meir bompengar 1,3 prosent.

Av dei 264 elevane på skulen vart det registrert 239 gyldige røyster.