Brann i campingvogn på Kvamskogen

Brannvesenet rykte sundag kveld ut til brann i ei campingvogn med spikartelt på Fureberghovden camping på Kvamskogen. Klokka 21.41 melde 110 Vest at brannsløkking var sett i gang.

Vona var å kjøla ei nabovogn ned slik at brannen ikkje skulle spreia seg til henne. Klokka 22.00 var siste nytt at flammane var slegne ned og grannevogna var berga, men at brannvesenet enno ikkje hadde kontroll på brannen. 22.17 vart det meldt at brannen var sløkt.

Helge Neteland, som eig campingplassen saman med Siri Steine, fortel at han fekk telefon av ein person på campingplassen om at det brann og at han burde ringja brannvesenet. Eigarane heiv seg i bilen. Då dei kom opp på Kvamskogen, var brannen så godt som sløkt. Neteland veit ikkje noko om brannårsaka. 

Ifylgje Neteland var ingen i vogna, men det skal ha vore folk i henne i helga. Fyrstnemnde fekk han stadfesta etter å ha vore i kontakt med vogneigaren sundag kveld.

Vogna stod på ein del av plassen der det er mest avstand til naboane. Ifylgje Neteland var det flaks at det var vindstille, for elles kunne truleg brannen fort ha spreidd seg. To naboeiningar fekk likevel overflateskadar etter varme frå brannen.

Også politiet rykte ut. Måndag seier politioverbetjent Jarle Sjo Myklebust ved Kvam politistasjon at det er for tidleg å seia noko om brannårsaka. Politiet vil etterforska brannen.

110 Vest melde fyrst at det brann i to campingvogner. Dette viste seg å vera feil. Red.