Kong Harald V er død
(NPK-NTB): Kong Harald V av Noreg er død, opplyser Kongehuset. Haakon er Noregs nye konge.
Publisert
Sist oppdatert
– Det er med djup sorg me kunngjer at Hans Majestet Kong Harald i dag gjekk bort. Kong Harald sovna stille inn på Rikshospitalet fredag 28. august klokka 06.35, opplyser Slottet.
Måndag 17. august opplyste kongehuset at kong Harald var innlagd på Rikshospitalet i Oslo etter ei legeundersøking. Han hadde fått kortisonbehandling for blodsjukdommen hemolytisk anemi. Dette førte til væskesamling i kroppen som måtte behandlast på sjukehus. Tilstanden forverra seg i helga, og han blei behandla med antibiotika for ein bakterieinfeksjon i blodet.
Torsdag morgon opplyste kongehuset at tilstanden var ytterlegare forverra og svært alvorleg.
– Legg ut kondolanseprotokoll
Ordførar Torgeir Næss opplyser på nettsida til Kvam herad at det vert lagt ut kondolanseprotokoll i Kvam rådhus frå klokka 12 fredag.
– Kvam herad takkar audmjukt for kongegjerninga til Kong Harald. I dag går tankane våre og medkjensla vår fyrst og fremst til familien og hans næraste. Denne kjærleiken, takksemda og medkjensla veit eg at folket i Kvam herad også kjenner på, skriv Næss.
Sjå videointervju med ordføraren om dødsfallet her:
Alle som ynskjer det, kan signera han og skriva ei siste helsing. Næss skriv vidare at kong Harald verkeleg har levd opp til valspråket «Alt for Noreg».
– Gjennom ein varm og inkluderande veremåte fekk han mykje å seia for svært mange. Han viste stor kjærleik til folket sitt, og folket hans gjengjeldte kjærleiken, skriv Næss.
Også Kvam bibliotek har lagt ut kondolanseprotokoll.
Ved flaggstonga framom Kvam rådhus vil det verta fjelga eit lite område der folk kan leggja helsingar til kongen, til dømes blomar og lys, opplyser rådmann Anita Hesthamar.
– Innstiller aktiviteten
Jondal kyrkje er open mellom klokka 12 og 15 fredag. Kyrkjeleg fellesråd opplyser at Norheimsund kyrkje fredag er open alle som ynskjer ein stad for stille, ettertanke og bøn. Mellom klokka 12 og 13 i dag vil kyrkjeklokker over heile landet ringa.
Leiar Michael Iversen i Kvam Ap opplyser til HF at partiet innstiller all aktivitet fram til etter gravferda. Ifylgje Næss inneber det at to planlagde vitjingar av stortingsrepresentantar vert droppa.
Tørvikbygd barnehage hadde invitert til tiårsjubileum fredag kveld. Dette vert avlyst, skriv Ingrid Rykkje Straumstein på Facebook.
35 år som regent
Harald V blei konge av Noreg i 1991 då far hans kong Olav døydde. Han blei saman med dronning Sonja signa i Nidarosdomen 23. juni same år.
Kong Haralds son går no frå å vera kronprins Haakon til å bli Noregs nye konge. Han skal informera regjeringa om kva namn og valspråk han vil velje i gjerninga si. Dotter hans, Ingrid Alexandra, er den nye kronprinsessa. Også ho kan bli tildelt nytt namn no.
Her kan du sjå att bileta frå då kongeparet vitja Jondal i 2019:
