
– Bil køyrde i fjellveggen
Ein bil køyrde av vegen nær «bostippen» mellom Ålvik og Ytre Ålvik måndag.
Det melde Vegtrafikksentralen vest klokka 14.34. Naudetatane var då på veg til staden. Fylkesveg 79 hadde redusert framkome og kunne verta heilt stengd.
Klokka 14.50 opplyste Vest politidistrikt i Politiloggen at den kvinnelege føraren var vaken og medviten etter kollisjonen. Klokka 15.10 opplyste operasjonssentralen at alle naudetatane var komne til staden.
Føraren fekk tilsyn av helsepersonell og fekk skyss heim etterpå. Politiet mistenkjer ikkje køyring i rusa tilstand, men førarkortet er kverrsett som fylgje av mistanke om brot på grunnregelen om å vera omsynsfull, varsam og aktsam i trafikken. Det var ikkje fleire personar i bilen.
Bilen var på veg frå Ålvik i retning mot Ytre Ålvik då ulukka hende. Bilen hamna i ei skråning og ute av vegen. Trafikken kunne passera.
Ulukka hende mellom Tveitnes og Ranaskjer mellom Ytre Ålvik og Ålvik, ikkje langt frå «bostippen».
Klokka 15.15 hadde brannvesenet og ambulansen reist frå staden. Noko seinare kom bergingsbilen fram.