Sjukehusdirektøren på Haukeland seier opp
Eivind Hansen gir seg som administrerande direktør på Haukeland universitetssjukehus i Bergen til våren, etter ti år i jobben.
– Eg har tenkt gjennom tida som kjem både for min eigen del, familien min og Haukeland universitetssjukehus. Oppsummeringa mi er at eg seier opp stillinga som administrerande direktør ved utgangen av mai 2026, seier Hansen i ei pressemelding.
62-åringen har vore tilsett på sjukehuset sidan 2009.
Annonse
– Eg har hatt nokre fantastiske år på Haukeland, seier Hansen,
Han trur sjukehuset vil vere tent med eit skifte der ein ny direktør kan sjå fem til ti år fram i tid og utvikle sjukehuset vidare.
– Eg er innstilt på å få til ein god overgang til ein ny direktør i tett dialog med styret og styreleiar, seier han.
Styreleiar Terje Breivik i Helse Bergen seier det er trist å miste direktøren.
Annonse
– Eivind Hansen har vore ein markant og viktig leiar for sjukehuset, seier han.
(©NPK)
