Gult var fargen i Furedalen
Sjeldan har det vore så mange kyllingar i Furedalen som det var sundag.
Ein kostymedag i alpinbakken var årsaka til den vesle fjørfeinvasjonen. Mange hadde vorte inspirerte av påskehøgtida. Dei utkledde gjestene kunne delta i påskerebusløp i bakkane. Det vart arrangert ei kort rebusløype for dei under seks år, og ei litt lengre for alle andre.
Tubbiar står bak
Bak det heile stod ei nokre privatpersonar som kallar seg Teletubbiene. Hanne Kathrine Østby-Solberg er ein av dei. Kostymedagen er ikkje det einaste ho stuntet ho har vore med på i det siste. For berre eit par veker sidan inviterte ho til akedoning-arrangementet «Ta sjansen» i Furedalen. Medan «Ta sjansen» har vore arrangert fleire gonger tidlegare, er kostymedagen eit nytt påfunn, fortel Østby-Solberg.
Artikkelen held fram under annonsen.
– Målet vårt er rett og slett å laga liv og røre på Kvamskogen. For oss om har hytter her oppe, er det veldig kjekt at det skjer noko, seier ho.
Interessa for rebusløpa var stor. Kort tid før starten kunne Østby-Solberg fortelja at talet på påmelde hadde bikka hundre.
– Vert kostymedagen ein ny påsketradisjon?
– Det kan godt henda. Og det kan henda Teletubbiene finn på andre sprell på Kvamskogen.
Lovar skiføre
Jan Guttorm Skeie er dagleg leiar i AS Kvam Fjellheisar, verksemda som driv Furedalen Alpin. Han tykkjer det er positivt at hyttefolket tek slike initiativ.
Påsken er ei viktig tid for alpinsentera. Som vanleg seier Skeie at vêret bestemmer kor gode besøkstala vert. Kostymedagen hadde perfekt påskevêr, men meteorologane kan ikkje lova at dei gode tidene held fram. Ein ting er Skeie likevel sikker på: Det kjem til å vera skiføre.
– Det er ingen fare for at me skal mista snøen i påsken. Det gjeld også ute i turløypene. Der er det punkt med lite snø, men der har me køyrt inn snø, fortel han.
Etter påske er planen å halda det gåande så lenge vêret tillèt det.
Artikkelen held fram under annonsen.
– Kor lenge det er, varierer frå år til år. Me har opplevd at me har halde ope heilt til i slutten av april. Skal me halda ope, må det koma folk. Etter påske kjem nok vårkjensla krypande hos mange. Dess nærare sommaren ein kjem, dess meir flyttar folk fokuset mot sommaraktivitetar, seier han.