– Melde ikkje tilbake innan fristen

Ullensvang Holding AS har ikkje gjort greie for arbeidet som er gjort i hyttefeltet i Mælsheiane i Herand.

Naturvernforbundet Hardanger sende i haust ei uromelding til Ullensvang kommune om anleggsaktivitet i Heiane hyttefelt. Aktiviteten endrar inntrykket av området og kan ha påført landskapet varige sår, skreiv forbundsleiar Klaus Rasmussen.

I eit brev 25. februar bad Ullensvang kommune Ullensvang Holding om å gjera greie for arbeidet i området. Kommunen har ikkje funne søknader i byggjesaksarkivet.

Då HF snakka med dagleg leiar Tore Eiken tidlegare denne månaden, sa han at alt skal vera søkt om og godkjent. Fristen for tilbakemelding til kommunen var 18. mars.

Sakshandsamar i Ullensvang kommune, Stefan Karlstrøm, opplyser at Ullensvang Holding tysdag denne veka ikkje hadde kome med tilbakemelding.

Viss ikkje kommunen høyrer noko, lyt ein ta utgangspunkt i kva ein finn av informasjon sjølv og handla ut frå det, seier han.

– Kva vil det seia?

– Det neste vert eventuelt å senda eit førehandsvarsel om pålegg om retting. Ullensvang Holding lyt anten søkja og få arbeidet godkjent eller føra tilbake det som er gjort, seier Karlstrøm.

Karlstrøm opplyser at det truleg vert gjennomført ei synfaring etter påske, og tek atterhald om at saka kan verta ein lang prosess.