Ho tok over turistroret

Julia Celina Aase Svåsand (26) danka ut åtte andre kandidatar og vart driftsleiar for turistinformasjonen i UIlensvang.

Ho har dimed overteke styringa av tre kommunale turistinformasjonskontor – i Jondal, Odda og Kinsarvik. Svåsand, som voks opp i Jondal og Odda, har tidlegare teke ei bachelorgrad i reiselivsleiing, og held på med ei mastergrad i innovasjon og leiing. Denne skal ho etter planen fullføra i 2025, noko kommunen har lagt til rette for.

Fram til juni skal ho berre ha ei 20 prosent stilling. Sidan vert det full stilling.

Noko av det fyrste Svåsand må ordna, er inntil tre turistvertar på informasjonskontoret i «Blåhuset» i Jondal. På dei andre kontora er rekrutteringsprosessen ferdig. Det førebelse personellvakuumet i Jondal trur ho er tilfeldig.

Lokalkunnskap

På kontoret i Jondal arbeidde Svåsand sjølv sommaren for to år sidan, noko ho treivst så godt med at det skuva henne frå utdanning innan hotell til reiseliv. Og ho søkte faktisk på den same jobben i år, i fall ho ikkje skulle verta tildelt leiarstillinga.

Etter hennar syn er det viktig med dugande tilsette på alle dei tre kontora, ikkje minst for å sikra best mogeleg lokalkunnskap i ein vidstrekt kommune. Jondal er dessutan eit naturleg knutepunkt, påpeikar ho, sidan tilreisande frå Bergen gjerne kjem med ferja og får ein naturleg pause på ferjekaien.

– Det er mange fine attraksjonar ein ikkje tenkjer over. Det er ikkje så enkelt å sitja på eit kontor i Kinsarvik og vera spesialist på alt som skjer i Jondal. Med spreidde tilsette utvidar ein den samla kunnskapen og kan samarbeida. Det er vanskeleg å vita alt om heile kommunen, seier Svåsand.

Meir enn enkle svar

Etter hennar syn bør eit turistkontor tilby ikkje berre svar på spørsmål om eksempelvis turstiar og rutetider, men i tillegg vera eit utstillingsvindauga for regionen og gje gjestene svar på det dei ikkje visste at dei trong å vita. Slik kan ein gjerne få dei til å bli lenger og koma attende seinare. Turistvertar bør elles vera både blide, utettervende og kunnskapsrike, understrekar den nye driftsleiaren.

Turistinformasjonen i Odda flytta 1. mars frå lokale i sentrum til kinofoajeen i Ullensvang rådhus. Sidan skal han flyttast vidare til ein ny terminal for kollektivtransport, som Svåsand vonar og trur vil utvikla seg til eit nytt sentrum i den einaste byen i Hardanger.

Målet med flyttinga til rådhuset er eit meir robust tilbod der fleire tenester kan samarbeida, fortel Svåsand. Så langt har turistinformasjonen halde til i rådhuset berre om vinteren.