Samla bygdefolk med marknad

I ungdomshuset i Tørvikbygd kunne ein finna litt av kvart laurdag. Då skipa ungdomslaget til salsmarknad for fyrste gong.

Då HF var på plass i Bygdatun halvannan time etter at dørene opna, var det nokså roleg i lokalet. Langs veggene og midt på golvet stod bord fulle med alt frå klede og sko til servise, pynt, leiker og måleri.

I eitt av hjørna sat Elisabeth Djupevåg Handegård, som var ei av dei som stilte ut og selde varer. På bordet framfor henne låg bøker, akvarelltrykk og ei samling av dukar av ymse sortar.

Handegård fortel at ho vart oppmoda om å delta på marknaden, og at ho ikkje var vond å be. I førevegen tok ho ein runde i heimen og rydda i skuffer. Det som låg på bordet, var eit resultat av dette, forklarar ho. Akvarelltrykka er det ho sjølv som har laga.

Ifylgje Handegård hadde det vore ein del folk innom då dørene opna, og ho hadde fått selt eit bilete og nokre bøker. Ho vona at ho ville få selja meir utover dagen.

Systrer stilte sterkt

Nokre hakk lenger inn i lokalet var fire systrer samla. Gro Røberg Svendsen, Eva Norheim, Kari Skår og Anne Aarhus Røberg.

– Det er moro å vera her og gjera noko saman, seier Svendsen.

Tre av systrene hadde kvart sitt bord på marknaden. Svendsen, som har delteke på nokre messer tidlegare, stilte ut ulike figurar av betong. Systrene Skår og Røberg stilte på si side ut for fyrste gong. Skår, som selde måleri og heimelaga vesker i ymse fasongar, fortel at ho var litt spent i førevegen.

– Heldigvis har det gått langt betre enn frykta. Eg har fått mykje god respons, seier Skår.

Medan Skår og Svendsen baud på varer dei sjølve har laga, hadde Røberg teke seg ein rydderunde i heimen og stilte ut mykje forskjellig.

– Eg likar å samla på ting, så eg har med litt av kvart, seier ho.

Ei av dei som nytta delar av laurdagen i ungdomshuset, var Lena Dögg Davidsdottir Jensen.

– Eg er nysgjerrig på kva som vert stilt ut, seier ho.

Jensen fortel at ho tykkjer det er moro med gjenbruk, og at ho likar å vera på messer. Laurdag hadde ho ingen andre planar enn å sjå på det som vart stilt ut. Om det vert skipa til liknande arrangement seinare, vert ho kanskje å sjå på den andre sida av borda neste gong, slår Jensen fast.

Kan verta tradisjon

Åsne Gilbakken, leiar i Tørvikbygd Ungdomslag, fortel at ho er svært nøgd med responsen på arrangementet I alt 24 bord bogna av varer. For å få eit bord, har kvar av utstillarane betalt ein symbolsk sum til ungdomslaget. Gilbakken seier at styret fyrst snakka om å skipa til ein bruktmarknad, men at det heller vart ein salsmarknad då ynsket var at utstillarane skulle stå fritt til å ta med både gamalt, nytt og heimelaga.

Sjølv om det var både kjøp og sal i lokalet, var arrangøren mest oppteken av anna enn pengar.

– Årsaka til at me lagar til dette, er at me vil gjera noko for dei i bygda. Det skal vera noko hyggjeleg som samlar folk, understrekar Gilbakken.

Det er ein knapp månad sidan gjengen i styret vart samde om å laga til ein salsmarknad i bygda. Ifylgje Gilbakken er det fyrste gong det har vorte arrangert ei slik messe i Tørvikbygd. Om marknaden laurdag var starten på ein ny tradisjon, vil tida visa.

– Me har snakka om at dersom responsen var god, vil me kanskje prøva oss att til hausten. Styret vil ha ei evaluering, så får me sjå, seier Gilbakken.