Bergtun til topps i Tromsø

Malin Auganæs Bergtun frå Kvam gjorde det godt både på standplassen og i skisporet i helga. Det førte til at ho hamna på pallen to av tre dagar.

I helga arrangerte Tromsø Skiskytterklubb både noregsmeisterskp (NM) og noregscup – også kalla ASKO Cup – i Tromsø. På startstreken stilte mellom andre to kvemmingar.

Sigra på sprinten

Laurdag stod sprint på programmet. I klassen kvinner senior, som gjekk noregscup, var det skiskyttaren frå Norheimsund som kapra den gjævaste plassen.

Bergtun, som representerer Kvam Langrenn- og Skiskyttarklubb og Team Midt-Norge, trefte med 9 av 10 skot og heldt bra fart i sporet. Ho var 40,9 sekund raskare enn Hedda Thoresen Tretteteig Bolstad, som går for Simostranda IL og Holmenkollen Biathlon. Vingrom-skiskyttar Sigrid Owren var 52,4 sekund bak. Dei 3 på pallen skaut likt.

På normalprogrammet fredag gjekk det ikkje like godt for kvemmingen. Sjølv om ho heldt godt fart i skisporet, var det for mange bomskot til å koma høgt på resultatlista. Bergtun fekk 16 av 20 treff og enda på 13.-plass, 4.42,6 bak Hønefoss-jenta Tuva Aas Stræte.

Også kvemming Andrea Sørheim Almeland var i Tromsø. Almeland går i klassen K18 og representerer Kvam LSK og Team Gla'laks Biathlon. Fredag var det NM i sprint. Då kom Almeland på 11.-plass med 15 av 20 treff. Ho var 5.42,6 bak vinnar og vossing Julie Tronerud Kvelvane.

Noregscupnormalrennet laurdag vart noko tyngre for kvammajenta. Med 4 av 10 treff enda ho på 20.-plass. Ho var 4.25,4 bak 1.-plassen.

Tok NM-medalje

Sundag gjekk båe kvemmingane stafett. Best gjekk det for Bergtun. Ho gjekk mixstafett for 1.-laget til Hordaland i klassen 17–senior saman med Martin Femsteinevik og Jens-Henrik Hegg. Dei tre vestlendingane var med i gullkampen, men måtte sjå seg slegne av Buskerud 1 på oppløpssida. Ankermann Hegg kom i mål 3,5 sekund bak rivalen frå austlandet, men sikra laget NM-sylvet.

Almeland gjekk NM i parstafett saman med Kristin Hopsnes. Dei to utgjorde 3.-laget til Hordaland. Duoen fekk båe fleire turar innom strafferunden, og enda på 10.-plass, 11.19,9 bak vinnarlaget frå Buskerud.