Éin vil bli kyrkjeverje

Berre eitt namn stod på søkjarlista då fristen for å søkja stillinga som kyrkjeverje i Kvam gjekk ut.

Det opplyser konstituert kyrkjeverje, Olav Skeie Lid. Namnet på lista var hans eige. Lid er mellombels tilsett til og med juni i år, etter at han erstatta Sigrid Karoline Eriksen-Tufteland i fjor.

Lid seier at han søkte på stillinga fordi han set utruleg pris på alle som arbeider i staben, og som fyller dagen med glede og meining. I tillegg er jobben spanande i seg sjølv, i ei kyrkje som er der i livsens mange overgangar for alle som søkjer dit, fortel han.

Tidlegare kyrkjeverje Hans Soldal er av habilitetsgrunnar hyra inn som ekstern rådgjevar i tilsetjingsprosessen. Med seg i eit intervju- og innstillingsutval har han fellesrådsleiar Margun Mikkelsen Tordal, nestleiar Astrid Helleve Fylkesnes og kantor Sevinj Asgarova Øvrehus.

Soldal opplyser tysdag denne veka at utvalet ikkje har møttest etter at søknadsfristen gjekk ut. Sjølv trur han ikkje at fellesrådet, som har møte onsdag 20. mars, vil verta rådd til å lysa ut stillinga på nytt for å få fleire søkjarar.

– Faktisk så har me jo ein god søkjar, seier Soldal.