Pålegg deltaking i fjordovervaking

Ei rekkje havbruksselskap må punga ut for eit sams program for overvaking av sjøen i Hardanger.

Bak står Statsforvaltaren i Vestland, som har varsla oppdrettarane i Hardanger om at dei må betala for å undersøkja den samla belastinga på fjordsystemet.

Bakgrunnen er krav i vassforskrifta, og pålegget er gjeve med heimel i ureiningslova. Forskrifta seier at alle vassførekomstar skal ha minimum god økologisk og kjemisk tilstand innan 2027.

I dag har dei fleste registrerte vassførekomstane i Hardangerfjorden moderat eller god økologisk tilstand, medan alle så nær som éin har dårleg kjemisk tilstand, syner data frå Vann-Nett.

Den samla kostnaden med programmet er 4,35 millionar kroner utan moms. Kostnaden er fordelt på verksemder og kommunar med utsleppsløyve. Også Elkem ASA Bjølvefossen i Ålvik og fleire industriverksemder i Ullensvang er oppmoda om å vera med i eit spleiselag, men det er frivillig for verksemder som har Miljødirektoratet som ureiningsstyresmakt.

Prøvetakinga starta i januar. Den fyrste rapporten er venta i februar 2025. Multiconsult AS skal gjera jobben.