Tvillingar på pallen

Erika og Aina (13) Sørheim Almeland køyrde fort og godt i Eikedalen i helga. Systrene vart topp tre båe dagar.

Tvillingsystrene frå Øystese spara ikkje på krutet då Tertnesrennet vart arrangert i Eikedalen i helga. Dei syrgde for at to tredelar av pallen var fylt med kvemmingar både laurdag og sundag.

Fyrst ut var storslalåm laurdag. Etter 1. omgang var Erika nummer 1 og Aina nummer 3. Resultatet var likt etter 2. omgang. Dimed kunne Erika klatra øvst på pallen på premieutdelinga. Totalt var ho 2,36 sekund raskare enn Lille Sverdrup Ulvesæter, som køyrer for Tertnes Alpin, og 3,5 sekund raskare enn tvillingsystera.

Sundag vart det nokre små justeringar i rekkjefylgja i slalåmrennet. Odda-alpinisten Ada Skjerven Spook køyrde fortast av alle og sikra seg 1.-plassen. Nest best var Aina, som var 9,31 sekund bak vinnaren. Erika hamna på 3.-plass. Ho var 4,44 sekund bak systera og 13,75 sekund bak Spook.

Jentene deltok i klassen U14. Totalt 10 løparar var med båe dagar.

Saman med veslesyster Åsta er tvillingsystrene dei einaste frå Kvam som satsar på i alpinsporten. Sidan det ikkje er ein eigen klubb i kommunen, representerer dei Samnanger Idrettslag.