Full fres på framsyning
Det vart stinn brakke og ståande applaus då framsyninga «Rossvollrussen på bortebane» hadde premiere fredag kveld.
Stolar og benkar var allereie fullsette då HF kom på plass tjue minutt før framsyninga skulle starta. Ungdomar i russeklede trippa fortare og fortare fram og tilbake i salen, og spente foreldre fylgde med. «Eg har ikkje sett sonen min heile veka», sa ei av mødrene.
Anders Botnen og Lars Stevnebø Kaale var mellom dei som stod i døra for å ta imot publikum. Sistnemnde kjende seg klar, men litt nervøs. Og verre ville det verta når han skulle gå inn att i salen og sjå alle i publikum, meinte han.
Artikkelen held fram under annonsen.
– Men sit alt som det skal?
– Ja, eg føler det har sete dei siste dagane, svara Kaale.
Sjå biletserie frå framsyninga:
Bilete 1 av 29
Programmet starta med eit fellesnummer.Bilete 2 av 29
«Viggo Venn», spela av Anders Botnen, kom att ved fleire høve i løpet av førestillinga.Bilete 3 av 29
«Kjell» spela av Live Tonning Kjøsnes.Bilete 4 av 29
Teodor Græsdal Pedersen og Eline Bekkesletten spela «Håvard» og «Britt».Bilete 5 av 29
Treningsinstruktør «Ann Maybritt» (t.v.) var spela av Elina Johansen, medan Malin Beijersbergen spela ei av fleire slitne damer som var med på time.Bilete 6 av 29
«Mannabenken». Denne gongen spela av Lars Kristian Høydal (t.v.), Bernhard Ljones og Anders Botnen.Bilete 7 av 29
Dårleg høyrsel kan gje dårleg oppførsel.Bilete 8 av 29
Live musikk høyrde med til fleire av songane. Her er Kajetan Sawicki på gitar, Monica Zengh på bass og Ragne Fosso på keyboard. Bak dei er Hans Vestrheim på slagverk.Bilete 9 av 29
Nils Eirik Skaar Ljones (t.v.) og Kajetan Sawicki. Redaktør «Sigurd Laksen» intervjua «Jon Fosse», som vann nobelprisen i litteratur.Bilete 10 av 29
Også Malin Beijersbergen, her som Heidi Sandven Botnen, vart intervjua. Reporter var Elina Johansen.Bilete 11 av 29
Kajetan Sawicki drog fram eit av dei litt mindre kjende talenta til Jon Fosse.Bilete 12 av 29
Rektor ved Kvam ungdomsskule (Isak Honningsvåg Vik) var stornøgd med gode resultat av hærverksklokka. Elevane, spela av Eline Bekkesletten og Emil Sundsøy, brydde seg mindre.Bilete 13 av 29
Olai Sandven spela normbrytaren Trond Soldal. Live Tonning Kjøsnes intervjua han.Bilete 14 av 29
Den brystfagre reporteren «Bjørk», spela av Teodor Græsdal Pedersen.Bilete 15 av 29
Ola Breivatn var ikkje nøgd med Kvam herad.Bilete 16 av 29
Denne mammaklubben hadde mykje å ta omsyn til i samtalen. Frå venstre: Malene Utskot, Linnea Stryker-Vassnes og Tuva Mæland.Bilete 17 av 29
Framneselevar vart sjølvsagt skøya med. Frå venstre: Bernhard Ljones, Isak Honningsvåg Vik og Linnea Stryker-Vassnes.Bilete 18 av 29
«Kjell» framførte eigen song og hadde med seg dansarar. Samuel Skåre vinkar.Bilete 19 av 29
Dette biletet talar for seg sjølv. Live Tonning Kjøsnes og Linnea Stryker-Vassnes.Bilete 20 av 29
Etter pausen opna russen med song.Bilete 21 av 29
Lærar Eiliv Nyland (t.v.) hadde invitert kollegaane Øyvind Soldal, Åse Botnen, Gry Svartveit, Oddbjørn Berge og Heidi Sandven Botnen på vorspiel.Bilete 22 av 29
Også lyd og lys styrte ungdomane sjølve.Bilete 23 av 29
Bakarst står Magnar Mo og Tuva Mæland. Framme er Linn Grete Tellevik og Samuel Skåre.Bilete 24 av 29
Teodor Græsdal Pedersen (bak) og Samuel Skåre.Bilete 25 av 29
«Penga, penga, penga» heiter dette nummeret. Frå venstre: Frå venstre: Emil Sundsøy, Eline Bekkesletten, Henriette Henriksen, Tuva Mæland og Anna Flotve.Bilete 26 av 29
Tuva Mæland på jakt.Bilete 27 av 29
Lars Stevnebø Kaale (t.v.) var ny i jobben. Det baud på trøbbel. Øyvind Hildonen-Teigland spela kunde.Bilete 28 av 29
Lars Stevnebø Kaale.Bilete 29 av 29
Nøgd ungdom. Frå venstre: Tiril Onarheim Torvund, Emil Sundsøy (bak), Øyvind Hildonen-Teigland, Tuva Soldal og Anna Flotve.«Mannabenk» og misjon
Litt surr med lyden førte til leven i høgtalarane ti minutt før start, som i alle fall vekte liv i ein fredagstrøytt journalist på fyrste rad. Truleg fekk det òg opp adrenalinet bak scena. Det vart med den eine glippen.
Framsyninga tok utgangspunkt i «Kjell» og «Håvard», som hadde gått på skule saman, og treftest att på ferie. Situasjonen var lett å kjenna seg att i, og klassiske skilnader vart trekte fram.
Den tøffe «Håvard» var tydeleg inspirert av Leo Ajkic, medan forsiktige «Kjell» minte om namnebroren i Olsenbanden. Publikum såg ut til å lika begge.
Historia rundt hovudpersonane og «den raude tråden» fall litt bort til tider. Det gav plass til meir sjølvstendige sketsjar. Då fekk publikum mellom andre helsa på den spreke treningsinstruktøren «Ann-Maybritt», «Jon Fosse», redaktør «Sigurd Laksen» og einstøingen «Ola Breivatn», for å nemna nokon.
Også dei nær sagt obligatoriske sketsjane om lærarrommet, Framnes Kristne Vidaregåande Skule og «mannabenkjen» dukka opp.
Artikkelen held fram under annonsen.
Betre enn venta
I pausen hagla det med ros blant publikumet i kakekø, og det viste att då framsyninga etter 2,5 timar, inkludert pausen, tok slutt. Frå scena fekk ungdomane ståande applaus. Då salen var tømd for folk, slo HF av ein prat med nokre av skodespelarane. Stemninga bar preg av adrenalin og glede. Alt gjekk langt betre enn venta, meinte fleire.
– Eg er heilt overvelda, sa Live Tonning Kjøsnes.
I tillegg til å ha hatt ansvaret som revysjef saman med Astrid Aksnes, var ho titt og ofte å sjå på scena i ulike roller. Ho spela til dømes «Kjell». På scena såg ho ut til å trivast. Teodor Græsdal Pedersen, som spela «Håvard», lét òg vel over premieren.
– På generalprøven stressa alle på bakrommet, men i dag var det mykje meir ro over det, fortalde han.
– Ikkje for seint
Noka stor feiring stod ikkje på planen. Det fekk venta til laurdagen, meinte Kjøsnes. Men ein god og samansveisa prat skulle gjengen ta seg tid til, sa Anna Flotve. Den siste veka har dei fleste ledige timane i døgeret vorte brukte i Holmatun. Russane er framleis ikkje leie av kvarandre, men vedgår at det har vore litt slitsamt.
– Men så har me jo ofte vore att lenge etter at me har vore ferdige, fordi me har hatt det kjekt, sa Kjøsnes.
Eit råd til neste års russekull er å tenkja på at det er utruleg mykje meir arbeid bak ein revy enn ein trur. Det er ikkje berre å skriva manus og spela. Alt arbeidet bak scena lyt òg tenkjast på, tipsa Kjøsnes. Og så er det lurt å delegera arbeidsoppgåver ganske tydeleg, meiner Flotve.
– Er det nokon i kullet som bør vurdera å verta skodespelar?
Artikkelen held fram under annonsen.
– Lars (Stevnebø Kaale, journ. merknad)! kom det raskt frå ei.
– Og Lars Kristian (Høydal, journ. merknad)! sa ein annan.
– Det er ikkje for seint å søkja på teaterskulen, trur eg, sa Kaale sjølv.
