Minte politikarane om at fagfolk er fagfolk

Politikarane vart kreative i innspurten av trafikksikringsplanen, men varaordføraren dempa skapargleda effektivt.

Det eine etter det andre av seine, politiske innspel om punkt i trafikksikringsplanen vart fremja då heradsstyret skulle vedta planen 7. desember.

SV var fyrst ut i rekkja. Geir Madsen (SV) serverte ei lang rekkje framlegg om tilleggspunkt i planen, mellom anna om gangvegar, fartsgrenser, fartsdempande tiltak, busskur og sykkelskur. Deretter kom i tur og orden INP, Ap, Sp, R og H på talarstolen, dels for å fremja eigne framlegg og dels for gje støtte til enkelte av ideane til dei andre partia.

– Umogeleg situasjon

Idédugnaden vart effektivt dempa av varaordførar Frode Nygård (Frp) og eit påfylgjande gruppemøte.

– Heradsstyret set seg i ein ganske umogeleg situasjon. Me har bruka år og store ressursar på å utarbeida planen. Titals fagfolk har vore med og gjeve bidrag, vurdert innspel og gjort ei prioritering. No sit me og «arbeider opp att» heile planen, sa Nygård.

Han meinte at ein anten måtte vedta alle dei nye framlegga og skapa «eit enormt dokument med veldig mange ting», eller droppa dei. Etter hans syn råka fleire av forslaga vedtak, debattar og prosessar som allereie er sette i gang, slik at det kan verta vanskeleg vita kva føringar ein skal retta seg etter.

Bjørgulv Hauger (Frp) minte om at planen skal reviderast sidan, og at det såleis kjem nye mogelegheiter. Fleire av framlegga kan mogna og takast opp seinare, meiner han.

Full retrett

Enden på visa var at fleire framlegg frå fleirtalskoalisjonen, H og Sp vart trekte, og at berre nokre tilleggspunkt tilrådde av formannskapet vart vedtekne.

– Det smertar å seia det, men me tek poenget til Nygård, sa Arne Sandven (H).

– Eg skjønar poenget, sjølv om eg ikkje likar det. Me får vel trekkja det, sa Svein Johannes Stuve (Sp).

– Det kan ta litt av. Endeleg kan me gjera noko konkret, men eg ser at det er vanskeleg å få gjennom så mange framlegg. Eg har ikkje lyst til å trekkja framlegga, sa Madsen.

Nedstemte framlegg

Det heile enda med litt plukk og miks. Dei minste partia trekte ikkje framlegga sine. Dei vart i staden nedrøysta i tur og orden:

• Håvard Gjerde (R) fekk ikkje støtte frå andre enn KrF og SV til eit framlegg om å prioritera redusert fartsgrense til 70 kilometer i timen mellom Aksnes og Berge.

• Odd Valland Bovim (MDG) fekk ikkje støtte frå andre enn INP, SV og R til eit framlegg om å prioritera utvida fortau mellom Toloheimen og gamleskulen i Norheimsund.

• Bjarte Helland (INP) fekk ikkje støtte frå andre enn R, SV, MDG og tre i H til eit framlegg om å be fylkeskommunen vurdera løysinga for å tryggja mjuke trafikantar på vegen til ferjeleiet i Tørvikbygd.

• Helland fekk ikkje støtte frå andre til eit framlegg om å be fylkeskommunen prioritera sikring av mjuke trafikantar gjennom gangfelt på hovudvegen i Ålvik.

• Berre MDG, SV og R stilte seg bak eit framlegg frå Helland om å avklara mogelegheita for ei parallell gangbru for mjuke trafikantar i Ålvik.

Innstillinga frå formannskapet vart dimed ikkje endra. Even Øyri (Ap) meiner at trafikksikringsplanen ideelt sett burde ha vore handsama i eit anna møte enn budsjettmøtet, for å sikra han grundigare handsaming.

Innspel frå unge og eldre

Også ungdomsrådet kom med innspel til planframlegget. Rådet tok til orde for å senka fartsgrensa forbi Berge Gard og Gartneri i Tørvikbygd frå 80 til 60, i tillegg til å forby forbikøyring på strekninga. Heradsstyret er samd i at fartsgrensa bør senkast.

Rådet ynskte i tillegg å oppmoda fylkeskommunen om å oppgradera fylkesvegen mellom Tørvikbygd og Mundheim, og å be Skyss stramma opp praksisen for å kontrollera om det står ventante passasjerar ved busskur i Tørvikbygd og Strandebarm.

– Her har passasjerar blitt gløymde på grunna av at bussane ikkje har køyrt innom stoppa, heiter det i framlegget, som ikkje vart fremja av dei vaksne politikarane.

Rådet for menneske med nedsett funksjonsevne stilte seg bak planframlegget, men bad om at det vert teke ekstra omsyn til syns- og høyrslehemma og at det vert etablert gang- og sykkelveg mellom Toloheimen og gamleskulen.