– Eigar må søkja om riving

Øystese Grendautval meiner noko må gjerast med ei falleferdig løe på Laupsa, og har purra Kvam herad i saka.

Heradet på si side er i dialog med ein representant for grunneigaren om sikring, og ein har diskutert moglege løysingar, opplyser rådmannen i eit brev til grendeutvalet. Representanten for grunneigaren har ein dialog med dei som nyttar vegen forbi løa. Neste steg er pålegg om sikring, alternativt riving av løa, etter at dei naudsynte avklaringane er gjorde, skriv rådmannen.

Dersom heradet ikkje får tilbakemelding innan rimeleg tid, vil ein ta neste steg i tråd med reglane i plan- og bygningslova. Heradet kan ikkje tillata at eit bygg vert rive utan at den naudsynte dokumentasjonen er levert inn saman med søknad om riving. Det er grunneigaren som formelt må søkja om riving, påpeikar rådmannen.

Trygve Vik (Sp) tok opp saka i møtet i planutvalet 31. januar, og fekk forsikringar frå rådmannen om at det vert arbeidd med henne.

I papiravisa 10. februar vart det opplyst at det var Svein Johannes Stuve (Sp) som tok opp saka. Det var altså Trygve Vik som gjorde det. Red.