«Oljemysterium» kan vera løyst

Det som kan sjå ut som oljefilm, vart ført frå Movatnet og ut i fjorden i føremiddag. Willy Pettersson trur han veit kvar ureininga kjem frå.

Fleire av dei som kryssa Straumbrua tysdag føremiddag, la merke til filmen som strøymde ut i vatnet på den eine sida av Straumen.

Aksjonerte ikkje

Teknisk sjef Lars Ese Ur i Kvam herad opplyser at mellom andre brannsjefen har vore ute i felten og sett på den potensielle ureininga. Det er vanskeleg å slå fast om det er snakk om olje eller noko anna, og heradet har heller ikkje lukkast med å lokalisera kjelda.

Ein teori er at filmen stammar frå området ved båthamna, til dømes frå ein båt, og at han har vorte ført inn i Movatnet når det har vore flod, seier Ur.

Uansett er mengdene såpass små at heradet har konkludert med at det har lite for seg å aksjonera for å stoppa den mogelege ureininga, fortel han.

– Heilt sikker

HF har fått tilsendt eit bilete som viser oljehaldig væske renna ned i eit kumlok like ved Straumen Senter. Om dette er kjelda, er uvisst, men det er fotografen, Willy Pettersson, heilt sikker på.

Han fortel at han observerte ureininga då han sat på kafeen i kjøpesenteret, og gjekk ned for å freista finna kjelda. Han såg tydeleg at det må ha leke det han meiner er diesel, kanskje frå ein parkert bil, som har runne ned i kummen og kome ut i sjøen. Så har floda teke væska med seg opp i Movatnet, før ho kom ned att med brakkvatnet då det vart fjøre sjø, trur han.

Pettersson har ikkje lukkast med å finna ut kven og kva som stod parkert på parkeringsplassen der ureininga var konsentrert.