Opnar for alkoholservering i venterom

No kan du ta deg ei øl eller eit glas vin medan du ventar på ferja i Jondal.

Jondal Matkanten & Catering AS fekk onsdag skjenkjeløyve for øl og vin. Løyvet, samrøystes gjeve av formannskapet i Ullensvang i møtet berre eit steinkast frå serveringsstaden, gjeld innandørs og i eit merkt område ved lokalet på ferjekaien frå klokka 11 til 20 kvar dag. Lokalet har åtte sitjeplassar inne.

– Rådmannen ser positivt på at Jondal får tilbodet, på line med andre stader i kommunen. Å imøtekoma søknaden vil styrkja tilbodet til turistar og lokalbefolkninga. Samstundes styrkjer det grunnlaget for kioskdrifta, heiter det i saksutgreiinga.

Rådmannen framhevar at Jondal ikkje har andre skjenkjestader i sentrum med heilårstilbod.

Ser prinsipielle problem

Heilt utan kny vart ikkje vedtaket til. Ingvild Hauso (Sp) etterlyste vurderingar av negative konsekvensar av løyvet, og spurde om det aktuelle kiosklokalet vert nytta av born. Lajla-Margrethe Lindskog-Lund (Sp) påpeika at lokalet er bygt som venterom med kiosk for dei som skal reisa med ferje og buss.

Sakshandsamar og avdelingsleiar for innbyggjarsørvis, Aslaug Margrethe Åkre, forsikra om at saka er grundig vurdert av administrasjonen. Det skal ikkje vera snakk om ein ny «bar», og søkjaren ynskjer å ha litt stil på det, opplyste ho. Aakre meiner at Jondal bør få heilårsskjenking på lik line med andre bygder.

Aakre opplyser til HF at administrasjonen ser på Matkanten som ein kafé eller restaurant, som er to av driftskonsepta som kan få skjenkjeløyve.

Sp trong eit gruppemøte for å verta samd med seg sjølv. Partiet støtta løyvet, men synest framleis at saka ber i seg prinsipielle problemstillingar. Området er lite og offentleg, og born og unge oppheld seg der utan foreldre, påpeika Hauso.

– Kan ikkje samanliknast

Dei alkoholpolitiske retningslinene til kommunen har ikkje eigne føringar for skjenkjeløyve på arenaer der born og unge ferdast. Alkohollova gjev kommunane høve til å leggja vekt på mellom anna «stedets karakter, beliggenhet, målgruppe, trafikk- og ordensmessigeforhold, næringspolitiske hensyn og hensynet til lokalmiljøet for øvrig». Denne føringa hadde vore aktuell dersom born og unge var målgruppa, ifylgje Aakre.

Ordførar Roald Aga Haug (Ap) påpeika i møtet at fleire skisenter har fått skjenkjeløyve, at Ullensvang er ein stor siderkommune og at nordmenn drikk meir «kontinentalt» enn før. Erlend Nævdal Bolstad (H) framheva at det er lovleg å ta med seg born på til dømes restaurantar der det er lovleg å skjenkja alkohol.

Hauso meiner at korkje skianlegg eller restaurantar kan samanliknast med eit ørlite venterom, og H var dels samd i det.

– Eg har tillit til at me klarar å løysa det på ein god måte, sa Bolstad, som reknar med at skjenkjekontrollar vil avdekkja det dersom drifta ikkje held mål.

Korkje politiet eller Nav hadde innvendingar til søknaden då han var på høyring, men politiet kravde at skjenkjelokalet vert tydeleg merkt og avgrensa.

Sakspapira vart tilgjengelege for dei folkevalde kort tid før møtet. Ordføraren opna for å handsama saka på kort varsel av di løyvet er viktig for søkjaren i turistsesongen.