Varslar møte om tomt med masselager

Enno har ikkje Kvam herad føreteke seg noko med bruken av tomta kloss i fylkesvegen i Norheimsund.

Det er Kvam Maskin og Transport AS som gradvis har teke tomta i bruk til kontor, parkering og masselager. Spørsmålet om arealbruken vart i oktober teke opp i planutvalet av Gry M. Kyrkjeeide (Frp).

Tysdag vart utvalet orientert om saka av Heidi E. Ørjansen, som er leiar for plan og byggjesak i Kvam herad. Ho opplyste at tomta er definert som næringsareal for mellom anna industri og lager i kommuneplanen frå 2019, men i den gjeldande reguleringsplanen er tomta avsett til forretning og kontor.

Planen opnar for lokale for mindre verkstader dersom dei ikkje medfører ulemper for omgjevnadene. Heradet må difor vurdera ulempene, ifylgje Ørjansen. Planen seier òg noko om at eit bygg på tomta vert eit signalbygg med portalverknad i Norheimsund.

Administrasjonen planlegg eit møte med verksemda og eigaren av tomta 23. november for å avklara om tiltaka er i tråd med reguleringsplanen. Om ikkje dei er det, kan brukaren søkja om godkjenning. I så fall får dei folkevalde saka på bordet.

Ifylgje Ørjansen gjorde heradet brukaren av tomta merksam på planstatusen då verksemda etablerte seg der.

21. oktober var det eitt år sidan Jan Lygre fyrst tok saka opp med heradet. I eit brev til Lygre i januar varsla rådmannen at saka ville verta teken opp i eit møte med verksemda.