Gult koronalys på Voss
Frå og med tysdag er alle skular og barnehagar i Voss herad pålagde gult nivå i smittevernet.
Det opplyser heradet i eit presseskriv.
Det er ikkje lenger karantenefritak for born og unge.
Artikkelen held fram under annonsen.
Bakgrunnen er smittesituasjonen og eit svært omfattande arbeid med testing og smittesporing.
At ein fjernar karantenefritaket for barnehageborn og elevar i grunnskule og vidaregåande, tyder at alle som er nærkontakt med ein smitta, må vera heime i karantene i ti dagar. Det er høve til å «testa seg ut» med ein såkalla PCR-test etter ei veke.
Heradet gjeninnfører smittekarantene for born og unge for å unngå at kapasiteten på testsenteret vert sprengd.
Som tidlegare vil alle born som er nærkontaktar, straks hamna i karantene. Dei vert testa så snart som råd er etter eksponering og etter ei veke. Voss herad meiner dette i større grad er eigna til å stoppa eventuell smitte.
Voss herad tilrår og oppmodar også alle som er vaksinerte, både dei som har fått ein dose og dei som er fullvaksinerte, om å testa seg både straks etter eksponering og etter sju dagar, dersom dei vert definerte som nærkontakt til ein med stadfesta smitte. Heradet oppmodar både del- og fullvaksinerte om å halda seg heime til svaret på første PCR-test er klart på helsenorge.no.
