Plan er omsider i boks

Klagen på reguleringsplanen for hytteområdet på Årvikneset i Jondal vart avvist av Statsforvaltaren i Vestland.

Henning Onarheim stod bak klagen. Han meinte at kommunen må sikra tilstrekkeleg akutt helsehjelp til brukarane av hyttene før ein opnar for å utvida hyttefeltet med 38 fritidsbustader. Dessutan hevda han at kommunen hadde gjort sakshandsamingsfeil. Kommunestyret avviste klagen i april.

Statsforvaltaren er samd med kommunen i at helseberedskapen må vurderast i overordna planar, med andre ord kommuneplanen, og at ein må leggja til grunn at kommunen stettar krava i lov om helse- og omsorgstenester. Statsforvaltaren meiner eit innspel frå Onarheim om å laga ein samla hytte- og beredskapsplan for kommunen, er godt og kan vurderast i kommuneplanen.

Statsforvaltaren er ikkje samd med klagaren i at det er gjort feil i sakshandsaminga.