Sætveithagen–Tørvikbygd: 97 kroner Tørvikbygd–Bergen: 57 kroner

Ferja over fjorden utan bil kostar jondølingane nesten like mykje som bussturen vidare til Bergen.

Bussane til Skyss har nyleg gått frå å operera med 477 soner til 7 soner. Ei bussreise frå Kvam til Bergen kostar no 57 kroner for ein vanleg vaksenbillett, og ei frå Jondal til Odda kostar 37 kroner.

I samband med strukturendringar har jondøling Frode Strønen stilt spørsmål til Skyss om prisane også inkluderer Skyss sine ferjeruter. Dette gjer dei ikkje, og ei reise over fjorden får dermed eit tillegg på 40 kroner for ein person utan køyretøy. Til dømes kostar ei reise med buss frå Sætveithagen i Jondal til barnehagen i Tørvikbygd, ei reise på om lag åtte kilometer, 97 kroner, medan kvemmingane altså kjem seg til Bergen – ei reise på åtte mil– for 57 kroner.

Strønen påpeikar at i det i byar som Roma og Stockholm i lang tid har vore likesælt kva type kollektivtransport ein nyttar. Har ein betalt billett i tidsrommet, tyder det ikkje noko om ein tek båt eller buss.

Pressekontakt i Skyss, Ingrid Dreyer, svarar at takst- og soneendringane er ei bussreform, og difor påverkar ho ikkje prisane på ferjene. Men i tida fram mot 1. januar 2020 kjem Autopass-regulativet til å verta innført på ferjesambanda som Skyss har ansvar for, og då vil passasjertillegget falla bort. Det at Autopass skal innførast på ferjene, er også ein av grunnane til Skyss ikkje har nytta ressursar til å utvikla ferjebillettar som ein del av billettapplikasjonen deira, ifylgje Dreyer.

Ho seier også at det ville ha gjort billettapplikasjonen mindre brukarvenleg og oversiktleg om alle ferjestrekningane – som det i Hordaland er særs mange av, og som dessutan har eigne takstar og regulativ – var inkluderte i appen. Av bussjåføren kan ein likevel framleis kjøpa gjennomgåande billettar, og dei vil oftast vera billegare enn tidlegare som følgje av den nye sonestrukturen.

Sjur Mikal Dolveredaksjon@hf.no