Næringslag går saman om eitt blad

For fyrste gong gjev Øystese og Norheimsund Næringslag ut sams marknadsføringsmagasin.

Det er på tide, meiner Marit Buttingsrud i Øystese Næringslag. Ho synest det har vore litt teit når blada Øysteseposten og Innom – to nokså like publikasjonar – har kome i postkassane på same dag dei siste åra. Når laga i tillegg har lyst til å samarbeida og ein kjem betre ut av det økonomisk, var det ikkje noko å nøla med lenger, meiner ho.

– Me har snakka om dette i næringslaga i alle fall i to–tre år, seier Buttingsrud.

Positivt innstilte lag

Også Glynt AS, grafisk verksemd i Øystese, har engasjert seg for utgjevinga. Verksemda la eit enkelt budsjett fram for næringslaga for å skissera kva satsinga kan innebera i kroner og øre. Båe laga stilte seg positive til ideen etter å ha sett reknestykka.

Dagleg leiar Eirik Kvarv påpeikar at bedriftene i Kvam kanskje har vorte utsette for vel mykje «annonsemas» dei siste åra. På hausten har nemleg både HF, næringslaga og Kvam Næringsråd banka på dørene for å selja lysingar til i alt fem utgjevingar. I tillegg har Hardangerfjordmagasinet vendt seg til verksemder i Kvam.

Overskotet ser så langt ut til å verta større med eitt sams magasin enn med to separate. Pengane går tilbake til utgjevarlaga og dermed til ymse tiltak i sentrum, fortel Buttingsrud.

Magasinet kjem i postkassane i Kvam og til hytteeigarar på Kvamskogen i veke 48. Redaksjonen – Glynt, Buttingsrud i Øystese Næringslag og Anja Kjosås Kaldestad i Norheimsund Næringslag – legg i desse dagar siste hand på «barnet».

Hovudføremålet er å nå lesarane med lysingar, men bladet inneheld også ein del juletilknytte tekstar skrivne av både redaksjonen og nokre utanforståande. Skriving og fotografering er i hovudsak gjort på dugnad.

Legg ikkje ned

Den nye utgjevinga har fått tittelen Glad handel, etter det pågåande prosjektet med mål om å få folk til å handla meir lokalt.

Tanken er ikkje at det nye magasinet nødvendigvis permanent skal erstatta den tradisjonsrike Øysteseposten, men sistnemnde er sett på pause. Det er enno ikkje avklara om det nye bladet kjem i fleire utgåver til neste år.

– Øysteseposten har trass alt 30 års historie, men me må prøva eit anna konsept, seier Buttingsrud.

HF gjer merksam på at grafikar Bodil Eide Laupsa i Glynt AS er syster til sambuaren til skribenten.

Red.