Reiselivet vil ta kontroll over tinginga

Reiselivet i Hardanger ønsker å halda på ein større del av den lokale verdiskapinga.

Ullensvang Reiseliv (UR), som har 68 medlemsbedrifter, og Visit Hardangerfjord AS, med 125 medlemmer, ønsker å gå saman med Trolltunga AS og Ullensvang kommune for å sjå på moglegheita for å skapa ei eiga løysing for å tinga overnatting, aktivitetar, mat og anna på nett. I dag er verksemder avhengige av eksterne leverandørar.

– Me opplever oftare og oftare at eksterne aktørar kjem inn og tek styringa med og eigarskap til våre produkt. No sist i sommar var det store aktørar som selde og fasiliterte bookingløysinga for siderbåten og vitjande på sidergardane, skriv UR i ein søknad til næringsfondet i Ullensvang kommune.

Sporadiske initiativ

UR søker om 200.000 kroner til å greia ut høvet til å starta eit lokalt bookingselskap i Ullensvang. Ein vil ta føre seg kva oppgåver eit slikt selskap skal vareta, kven som skal eiga det og korleis det skal organiserast. Ein skal òg finna ut kva praktiske og tekniske utfordringar ein står overfor, om dei kan løysast, og kva det vil kosta.

Temaet har vore drøfta i mange år, men initiativa har vore sporadiske og ikkje vorte noko av. UR meiner det er positivt at det no er fire store interessentar som går saman om prosjektet.

Målgruppa for løysinga er alle som har aktivitetar ein kan tinga, til dømes overnatting, aktivitetar og matservering.

– Ein positiv konklusjon kan gi stor lokal verdiskaping og bygga opp eit fagmiljø rundt tinging og tingingsløysingar. Kanskje òg eit system som er utvikla i Hardanger, som kan seljast til andre, skriv UR i søknaden.

– Stiller sterkare

UR spør seg om ein skal bygga opp eit eige fagmiljø og eit eige system, eller om ein skal velja leverandørar som er er kjente på marknaden og eit system som er kjent i dag. Det kan vera relevant å samarbeida med andre som jobbar mot det same målet, til dømes Norwegian Experience AS.

– Me ønsker å styra dette lokalt, sjølv om me òg ser betydinga av samarbeid og ekstern hjelp. Me veit at me ikkje kan klara alt sjølve, men me stiller sterkare dersom me klarar å setta oss i førarsetet og ha ein plan, står det i søknaden.