Godt for føtene i Øystese

Har du fotvorter eller ein liktorn som plagar deg, kan hjelpa vera ikkje lenger vekke enn Hardangersenteret.

Her har nemleg autorisert fotterapeut Siri Anne Høydal nyleg etablert seg i andre etasje.

Firmaet hennar heiter Hardanger Fotterapi.

Høydal har tidlegare arbeidd som frisør og i helsevesenet, og har vidareutdanna seg som fotterapeut med offentleg godkjenning.

– God etterspurnad

Ho har søkt kraftfondet i Kvam herad om 100.000 kroner til utviklingsarbeid og etableringskostnader. Høydal reknar med å få 50.000 kroner frå Hardangerrådet IKS.

– Eg kjenner andre som er i marknaden i denne bransjen, og meiner at det er god etterspurnad etter denne typen tenester, skriv ho i søknaden.

Høydal hadde nyleg opna klinikken då koronapandemien kom og gjorde at ho måtte stengja 12. mars. Ho hadde då nett kjøpt inn utstyr. Ho starta opp att 27. april. Øystesekvinna er målbedrift hjå Næringshagen i Hardanger og får rådgjeving der. Målgruppa er unge og gamle som treng fotterapi.

Store kostnader

– Kva gjer du no?

– No pussar eg negler, noko eg ofte byrjar med. Slipemaskina har ein innebygd støvsugar. Alt støv av nagl og hud går inn i ein pose.

– Gjer det vondt?

– Nei, det er veldig behageleg, svarar Jan Arild Høydal, mannen til Siri Anne og pasient til ære for fotografen.

– For å vita kva du skriv om, skulle du vore og teke ei behandling hjå meg, seier ho.

Det er store kostnader med å starta ein fotterapiklinikk, til dømes til pasientstol, slipemaskin og steriliseringsutstyr.

Høydal driv verksemda åleine. Det hadde difor ikkje noko for seg med noko meir enn eit enkeltpersonføretak.

– Eg vil i alle fall byrja med det, så får me sjå, seier ho.

Handsamar i senteret

Fotterapeuten er i utgangspunktet fast i Hardangersenteret, og tek berre i unntakstilfelle oppdrag ved til dømes Mikkjelsflaten viss nokon er sengeliggjande og ikkje kan koma ut.

Ho har òg vore på Strandebarmsheimen eit par gonger fordi brukarar har vanskeleg for å koma seg til Norheimsund eller Øystese.

– Eg prøver å få alle inn her. Det er målet. Det er ingen ideell arbeidssituasjon når eg skal behandla føter andre stader, for dei har ikkje alt utstyret som skal til, seier ho.

– Litt av omsyn til meg sjølv når det gjeld ergonomi, trur eg ikkje eg skal driva og behandla føter rundt omkring, seier Høydal.

Autorisert fotterapeut

Det er stor skilnad på fotpleiarar og fotterapeutar. Fotterapeut er ein verna tittel og vert rekna som medisinsk helsepersonell. Det er ikkje mange fotterapiklinikkar i Kvam.

Då Høydal byrja på utdanninga, visste ho at behovet var stort. Ho var ferdig utdanna i juni i fjor.

Høydal arbeidde i helsesektoren i mange år og såg eit stort behov for at nokon kunne stella føter. Det er viktig at spesielt dei med diabetes og reumatiske sjukdomar, og som har problem med føtene, kjem til ein fotterapeut.

Høydal seier ho taklar trugselen om koronasmitte godt. Ho hadde hatt ope i ein månad då ho måtte stengja ned. Det var ingen ideell situasjon. Fordelen med det var at ho ikkje hadde lange lister ho måtte ta att. Ho var litt skeptisk til om folk ville koma, men det gjekk fint. Mange eldre, men også dei yngre kom att. Folk var ikkje redde for å koma.

Strenge hygienekrav

Hygienen står i fokus i ei slik verksemd. Høydal har fått ekstra reglar å retta seg etter frå fotterapeutforbundet.

– Det er strenge krav, så eg trur folk føler seg trygge her, seier ho.

– Eg har fått mange positive tilbakemeldingar. Den siste pasienten i dag sa at eg måtte helsa til HF og seia at han var glad for å ha funne meg. Han var storfornøgd med føtene sine etter besøket her, seier Høydal.

Elles er folk glade for at dei slepp venta så lenge. For mange eldre er vegen til Norheimsund lang. Det er enklare for dei å koma til Hardangersenteret, der det òg er heis.

Fotterapeuten passar på at dei med diabetes ikkje utviklar sår på føtene. Dei med reumatiske sjukdomar har òg gjerne behov for rettleiing og fotstell. Ho behandlar også soppnegler og fotvorter. Fotvorter kan fjernast, men det kan vera ein lang prosess. Då må også immunforsvaret i kroppen arbeida.

Mange pasientar slit med liktorn. Desse vert skorne ut.

– Det er ikkje alltid at desse går bort med ein gong, men eg har fått tilbakemelding om at folk er nøgde etter slik behandling. Ein liktorn kjem av trykk, ytre belastning, og kjem att viss ein ikkje gjer noko med det underliggjande problemet. Fotterapeutar behandlar ikkje berre problemet, men er ute etter å finna årsaka til det. Det er òg ein vesentleg skilnad på oss og fotpleiarar, seier Høydal.