Mange vitja Trolltunga

Trolltunga, den kanskje mest spektakulære fjellformasjonen i Noreg, tiltrekte seg nesten dobbelt så mange nordmenn i juli og august i år som i fjor.

Totalt så langt i år gjekk 33.550 fotturistar den 28 kilometer lange vegen tur–retur frå Skjeggedal eller 20 kilometer tur-retur frå Mågelitopp. Det er omtrent halvparten så mange som i dei fyrste åtte månadene i fjor.

I januar–august i fjor gjekk 12.960 nordmenn til Trolltunga. I år gjekk 21.700 nordmenn den same ruta i same periode, ein auke på 68 prosent.

I sommarmånadene juli–august i fjor gjekk 9.485 nordmenn fjellturen. I same periode i år gjekk 18.175 nordmenn stien, ein auke på 92 prosent.

Frå 2010 til 2019 auka talet på fotturistar frå 800 til 80.000. Vanlegvis er det 80–90 prosent utanlandske turistar som går ruta, men i år var det flest nordmenn som følgje av koronastenginga av grensa.

I år var stien dekt av snø til starten på juli.

I 2016 var det 42 redningsaksjonar i området. Så langt i år har det vore 15. Dei fleste som treng hjelp, har forstuva ankelen eller fått annan lett skade. Det er oppretta ei fjellvakthytte med stasjonert fjellvakt i heile sommarsesongen.

Det opplyser Åse Marie Evjen, dagleg leiar i Trolltunga AS, i eit presseskriv og på telefon.