– God framdrift i Kvammapakken

Kvammapakken har god framdrift i januar og februar trass utfordrande vêrforhold, skriv Statens vegvesen på sine heimesider.

Dei to prosjekta som er under arbeid, er Skipadalen–”Evigheitssvingen” og Stronda aust for Øystese.

Mellom Skipadalen og ”Evigheitssvingen” er entreprenøren i gang med det tyngste arbeidet, som er å sprengja ut plass til anleggsvegen før det vidare arbeidet med å utvida vegen kan halda fram.

Det er sett opp lysregulering og vert utført manuell trafikkdirigering for å sikra tryggleiken til trafikantane. Dette kan gje noko kø dei neste tre månadene, seier prosjektleiar i vegvesenet, Rolf Harkestad.

Arbeidet med å utvida vegen ved Stronda skal vera ferdig til sommaren. Då vil vegen vera utvida med ny gang- og sykkelveg. I tillegg vert det nytt vass- og avløpsanlegg i bakken, skriv vegvesenet.

Harkestad ber folk om å følgja med på skilting sidan trafikken må leggjast om når nytt vass- og avløpssystem skal på plass.