- Ei styrking av tilbodet til born og unge

Sidan 1. mai har dei som ønskjer kontakt med barnevernstenesta på kveldstid og i helgane, hatt ein stad å venda seg.

Kvam herad har nemleg inngått eit samarbeid med Bergen kommune om barnevernsvakt.

- Det folk treng å vita om det nye tilbodet, er at når det oppstår akutte situasjonar medan den lokale barnevernstenesta er stengd, kan dei kontakta barnevernsvakta i Bergen. Når det gjeld situasjonar som ikkje er akutte, skal dei, som tidlegare, kontakta barnevernet i Kvam, fortel Kjersti Kloløck, som er konstituert barnevernsleiar.

Ho fortel at før avtalen med Bergen kommune tredde i kraft, hadde ikkje barnevernet i Kvam eit formelt tilbod utanom opningstida.

- Det som i realiteten skjedde, var at leiaren av barnevernet vart kontakta når det oppstod akuttsituasjonar. No kan barnevernsvakta i Bergen rykkja ut dersom noko skulle skje. Men kanskje minst like viktig er at det nye tilbodet gjev folk ein stad å ringja dersom det oppstår ein situasjon der dei er usikre på kva dei skal gjera. No vil barnevernskompetanse verta tilgjengeleg også når barnevernet i Kvam er stengt. Det er ei klar styrking av tilbodet til born og unge, seier Kloløck.

Mange kommunar i Hordaland kjøper barnevernsvakt frå Bergen. Heradsstyret i Kvam vedtok å verta ein del av samarbeidet like før jul. Prisen Kvam må betala for samarbeidet, er basert på innbyggjartalet i kommunen. I saksutgreiinga skreiv rådmann Anita Hesthamar at ho reknar med at samarbeidet vil kosta Kvam mellom 250.000 og 300.000 kroner i året. Kostnaden vert finansiert innanfor ramma til barnevernet.