Saknar politiske saker

Skrivar i Naturvernforbundet i Kvam, Oddvar Soldal, undrar kvifor ikkje dei sakene som er førebudde til politisk handsaming, kan liggja lett tilgjengelege. Nokre dagar før han skreiv til Kvam herad om saka 19. mars, var sakene som skulle opp i andre møtebolk, tilgjengelege på innsyn via møteplanen. Så forsvann dei frå møteplanen.

Soldal skriv at han er klar over at det går an å søkja i innsynsløysinga, men meiner det kan ta tid. Han har tidlegare teke opp at det er tenleg at saker som er klare til handsaming, vert tilgjengelege i innsyn med ein gong. Då kan både politikarar og andre interesserte få meir tid til å setja seg inn i sakene, skriv Soldal.

Administrativ rådgjevar Kari Weltzien Vik svarar at dei politiske møta vart avlyste på grunn av koronakrisa. Etter oppmoding vart difor også møta og dermed saklistene fjerna frå møtekalenderen.

Det vart godt opplyst at møta var avlyste, skriv Vik. Heradet planlegg digitale fjernmøte 31. mars og 15. april. Sakene vert melde opp på nytt og tilgjengelege i innsyn.

Vik minner om at Kvam herad er i ein krisesituasjon, og at det er dei same ressursane som vert nytta i arbeidet med krisa som i det politiske sekretariatet.

– Me ber difor om forståing for dette. Det er ikkje vond vilje som ligg bak! lovar Vik.

Soldal svarar at han framleis ikkje skjønar kvifor sakene som skal til politisk handsaming, ikkje vert offentlege etter kvart som dei er ferdige frå rådmannen.