Klokka var rundt 13.30 då to menn, ei kvinne og ei lita jente på om lag åtte år kom inn i butikken, fortel eigar og dagleg leiar Arne Digernes. Han var den einaste tilsette som var i butikken då det skjedde. Han vart truga med kniv då han konfronterte dei. Måten dei fire oppførte seg på, gjer det tydeleg at dei hadde planlagt ranet, seier Digernes. – Dei gjekk til plassane sine og fylte opp posar. Dei hadde truleg vore inne før og teke bilete, gjort seg kjende og merkt det dei skulle ta. Dei tok både dyre jakkar og treningsklede, mellom anna, seier Digernes. Han har ikkje fått oversikt over alt som vart stole, men reknar med tjuvane har teke varer for mellom 50.000 og 100.000 kroner. I andre etasje har dei teke omtrent alt som var, seier Digernes. Det var ein del kundar i butikken, så det gjekk først ikkje opp for butikksjefen kva som føregjekk. Etter kvart la han merke til den merkelege oppførsla. Han konfronterte den eine mannen, som svara med trugsmål før han la på sprang. Kvinna og jenta vart att, og det oppstod ein konfrontasjon mellom kvinna og Digernes. Ho gav han eit spark, og han tok frå henne ein papirpose fylt med varer. Gjerningspersonane hadde to–tre papirposar kvar. Digernes har i ettertid bite seg merke i at posane ikkje var frå butikkar som finst i Kvam. Han trur at tjuvane er frå ein stad i Søraust-Europa, kanskje Serbia eller Kroatia. Kvinna snakka svensk då han konfronterte henne. Digernes mistenker at gjerningspersonane er del av organisert kriminalitet. Digernes seier at butikken er forsikra, men at forsikringa er dyr, så det vert uansett eit tap for butikken. Han har ikkje noka formeining om kvifor nett MX sport vart råka. – Me har mange dyre varer, og er på eit senter med mykje folk. Det kan ha samanheng med det, seier han. Digernes seier at han har vore borti liknande situasjonar med forsøk på tjuveri i mindre skala fleire gongar før. – Men desse var meir trugande, og det var ikkje tilfeldig kva dei gjorde. Det var planlagt, seier han. Kvam Security AS skriv på Facebook at verksemda har fått fleire tips om varebilar som vart observerte fleire stader i Kvam laurdag. Nokon var vitne til ei overlevering mellom to bilar ved Steinsdalsfossen før ranet i Øystese. Ein annan tipsar vart følgd med på av ein utanlandsk mann og ei kvinne på kaien i Norheimsun, før dei to sette seg inn i ein varebil.
