Publisert 06. oktober 2018 kl. 15.12.

Køyrde i bil som hadde stogga


Tilsynelatande kom alle uskadde frå ei bilulukke på fylkesveg 7 nær Steinsdalsfossen laurdag ettermiddag.


Tre personar i to bilar var innblanda. Ifølje politioverbetjent og innsatsleiar Jarle Sjo Myklebust i politiet stogga den eine bilen, med to personar som kom frå Norheimsund i retning Kvamskogen, for å svinga av til venstre på Dalatunvegen. Bilen som kom bak, køyrde inn i den ventande bilen. Smellen var kraftig, og føraren i bilen bak vart send til kontroll på legevakta.

Myklebust fortel at politiet kjem til å kverrsetja førarkortet til føraren i den bakarste bilen, og vil oppretta sak. Årsaka er at det ikkje er teikn til at føraren freista stogga, noko som kan tyda på at føraren ikkje har vore merksam nok i trafikken.

Politiet, ambulansetenesta og brann- og redningsteneste rykte ut til staden. Trafikken vart dirigert forbi staden. Dei to bilane som krasja, vart ståande nesten berre i det eine køyrefeltet etter kollisjonen.