Ny rådgjevar inn døra i Jondal

Frank Westad (biletet) frå Fjellhamar er tilsett som ny personalrådgjevar i Jondal kommune. Han presenterte seg sjølv i kommunestyremøtet 26. september. Han overtek etter Birgitte Pedersen Ødegaard, som slutta i stillinga i sommar.

Westad var ein av fire søkjarar. Dei andre var Andreas Standal Eikrem frå Volda, Rune Brosing frå Haugesund og Kai André Hegland frå Oslo.

– Eg er spent på arbeidsmiljøet. Etter å ha jobba nokre dagar, verkar alt hyggjeleg og positivt. Eg vil gjera mitt for å påverka miljøet i rett retning, sa Westad til kommunestyret.

Han opplyste at han har juridisk, økonomisk og arbeidspsykologisk bakgrunn, at han har vore rådmann i tre kommunar, og at han har 12–13 år bak seg som personalsjef. Ifølgje porten.no er dei tre kommunane Aurland, Årdal og Hornindal. Westad driv eit enkeltpersonføretak som arbeider med rekruttering og leiingsutvikling.