Om kommuneplanen igjen

«Arbeidet med kommuneplanen har vore uoversiktleg og gjeve einskilde høve til å ytre seg, medan andre aktørar ikkje har fått dette», skriv Kari Mostad (MDG).

Takk til KrF og ordførar for svar på innlegg om problematisk kommuneplan. MDG set pris på dette, då det gjev oss eit ope ordskifte om arbeidet med kommuneplanen og korleis vi ser på prosessen. Miljøpartiet er som nemnt kritisk til prosessen rundt kommuneplanen, og ordføraren meiner vi ikkje har greie på politiske prosessar, medan KrF hevdar vi fer med tomme påstandar. MDG meiner det framleis er all grunn til å påpeike at arbeidet med kommuneplanen har vore uoversiktleg og gjeve einskilde høve til å ytre seg, medan andre aktørar ikkje har fått dette. Uttalen frå rådmannen om samanhengen mellom Lingalaks AS si interesse for aktivitet i Hardangerbadet og tilgang til Kvamsøy er ikkje tilbakevist.

Kommuneplanen er førande for dei neste 12 åra, og dermed ein viktig premiss for kva retning vi utviklar Kvam i. Forvalting av eit fjordbasseng må handle om meir enn kommunegrenser. Den mykje omtala regionale kystsoneplanen er utarbeidd av Hordaland fylkeskommune og har hausta mange lovord for å vere eit solid fagdokument, og var faktisk den fyrste regionale kystsoneplanen som vart sett i gang. No har andre regionar teke etter. Planen har markerte område som er frårådde oppdrett på grunn av lakseelver og vandringar av villfisk. Forsking på villfisk i Hardangerfjorden dei siste 20 åra er heilt eintydige: Lakselus (som har unaturleg gode vilkår med store mengder laks i fjorden, grundig dokumentert) og rømt oppdrettslaks som vert kryssa inn i dei lokale stammane, er den største trusselen mot lokale stammer av villaks og sjøaure. Det finst jo fleire trugsmål mot villfisk, min ingen som kan måle seg med desse. Noreg som nasjon har ansvar for å vareta villaksen. Juridisk er ikkje regional kystsoneplan bindande, det er rett. På grunn av den faglege tyngda vil eg påstå det betyr mindre at den ikkje er vedteken som følgje av klage frå m.a. Austevoll og Tysnes. Kvamsøy er dessutan den einaste øya av noko storleik i kommunen og viktig for friluftslivet og fjordlandskapet. Når ei så betydningsfull og kontroversiell endring som opning for akvakultur ved Kvamsøy vert innført så seint i prosessen, samanblanda med prosjekt i Hardangerbadet og i strid med solid fagleg forsking og kunnskap, friluftsinteresser og kulturlandskap, må ein faktisk vente reaksjonar.

Når Lingalaks produserer ein opplysningsfilm over kor ubetydeleg det føreslegne anlegget ved Kvamsøy vil vere, plassert i eit hjørne av arealet som er føreslått avsett til akvakultur i kommuneplanen, vert eg alt anna enn roa av det.

Eg finn det rimeleg ufint av KrF å påstå at MDG skuldar alle som har støtta Hardangerbadet med innskot for å ha kjøpt seg fordelaktig handsaming i kommunen. Som politisk parti er MDG med i arbeidet for å leggje til rette for næringsutvikling i Kvam. MDG ynskjer fiskeoppdrett i lukka anlegg, som ikkje har så stor betydning for økosystemet i fjorden og opnar for resirkulering av næringsstoff. Næringsutvikling er utruleg viktig for at vi skal kunne bu her i Hardanger, men vi må tenkje litt framover. Det er det ein forsøkjer med kommuneplanen.

For MDG

Kari Mostad