Ungdomsheimen – gang- og sykkelveg

Ja, så skjedde det som me frykta, snøen vart for tung og dermed ramla delar av taket saman. Huset har stått ope med knuste vindauge, som ungdomen har kosa seg med å kasta stein på, dermed kom der vind og vatn inn. Resultatet ser me no.

Men det kunne vore unngått, dersom dei hadde fått løyve til å bygga nytt hus. Eg veit ikkje kven me kan skulda på, anten vegstellet eller Kvam herad, men det er ei stor skam. Etter alle desse åra med venting på byggjehøgd fordi der skal koma ein gang- og sykkelveg. Det er vanskeleg å forstå at Ungdomsheimen, som har vore ei bedrift som vart bygd for 70 år sidan, ikkje kan få løyve til å bygga nytt, berre fordi ein gang- og sykkelveg på den motsette sida av fylkesvegen til Ungdomsheimen skal vera ferdig til bruk.

Fylkesmannen ville stoppa all bygging på Kvamskogen, men det vart berre Ungdomsheimen som måtte lida for det. Alle andre bygger nye hytter heile tida.

Dersom vegstellet no godkjenner plastduk på bakken med masse oppå, kunne ikkje Kvamskogen næringslag og Kvam herad koma til ei semje? Massane ligg der og ventar, når næringslaget har ledige maskiner, kunne det nytta ledig kapasitet stundevis, om det ville ta eit par år? Då skjer det noko, mot å venta på betre tider økonomisk for heradet? Ja, det er vel næringslaget og heradet som får pengane som kjem inn via arbeid og avgifter.

Vonar at det fine og oversiktlege området ved Ungdomsheimen kan verta utgangspunktet for både Mødal–Såta–Kvitingen og mot Kvanndalane og Fuglafjell. Ikkje som no; at nesten all ferdsel skal gå frå Mødalsvegen og Furedalen. Der det er både trongt og uoversiktleg.

Erling Sandven