Trond Mohn sikrar bygging av Hardangerbadet
Hardangerbadet vert bygt.
– Gratulerer, Kvam, Jondal og Hardanger! No kjem Hardangerbadet!
Det skriv Hardangerbadet AS og ordførarane i Kvam og Jondal i ei sams pressemelding i føremiddag.
Sparebanken vest har gjeve det naudsynte lånet til anlegget, etter at industrimilliardæren i Bergen i innspurten stilte opp med dei naudsynte garantiane som banken kravde for å delta.
Ifølgje meldinga har Hardangerbadet eigedom AS om lag hundre aksjonærar og nesten 45 millionar i eigenkapital. Mellom desse er LAB AS, Lingalaks og altså Mohn gjennom selskapet Meteva AS, som yter fleire titals millionar kroner, heiter det i meldinga.
– Hardangerbadet vil styrkja attraktiviteten til Hardanger, skapa positive ringverknader og vera eit nyskapande helsesenter med spennande arbeidsplassar, skriv ordførarane og Hardangerbadet.
Anlegget skal ha tre eigarar: Kvammabadet kF, Hardangerbadet eigedom og LAB E-invest AS. Sistnemnde eig hotellet, som skal utvidast og oppgraderast.
Ifølgje ordførar Jostein Ljones i Kvam vart lagnaden til anlegget avgjord mellom anna etter møte mellom Mohn sjølv og konsernsjef Jan E. Kjerpeset i Sparebanken vest tidlegare i veka.
I alt skal det investerast over 300 millionar kroner. Visjonen er å skapa eit nyskapande helsetilbod gjennom Helse i Hardanger AS og fleire eksisterande helsetenester som skal flytta inn i bygget. Mellom desse er apotek, legesenter, fysioterapi, helsestasjon og tannlege.
Artikkelen held fram under annonsen.
Opnar truleg i 2019
Martin Vik, dagleg leiar av Hardangerbadet AS, var i siste møte om lånet med Sparebanken vest tysdag.
– Me hadde eit oppklarande møte om kva som skal på plass og er på plass. Dei lokale bankfolka har gjort ein veldig god jobb for å synleggjera prosjektet overfor Sparebanken vest sentralt, så me fekk lånet me har bede om.
Vik skryter av dei bidragsytarane som har sikra at prosjektet vert gjennomført, mellom anna privatpersonar, næringslivet, Lab og Trond Mohn.
– Me har hatt ein svær dugnad. Med garantiar, kausjonar, eigenkapital og aksjekapital er me oppe i rundt hundre millionar kroner.
Når prosjektet no er fullfinansiert, skal entreprenør og byggherre inngå utbyggingsavtale. Vik rekner med byggjestart etter påske.
– Eg håpar me kjem i hamn med utfyllinga. Der må Kvam herad ta høgd for funnet på sjøbotnen.
Vik seier det hastar for Lab å koma i gang med arbeidet på hotellet om det skal kunna opna før 2019-sesongen.
Går alt etter planen, skal Hardangerbadet vera klart til opning hausten 2019.
