Sørvisbygg får innhald

Korleis skal utlysinga av drifta av sørvisbygget på ferjekaien i Jondal lyda? Fredag drøftar plan- og driftsutvalet eit framlegg til kriterium og driftsstandard som skal vera med i utlysinga. Bakgrunnen er eit vedtak i januar om å krevja at rådmannen legg fram teksten for politisk handsaming før utlysing.

Framlegget til utlysing inneber at kommunen ynskjer lokalt tilverka produkt bygde på lokale tradisjonar. Nye produkt og tilbod vil verta vektlagde, og forretningsmodellen må vera berekraftig og leggja til rette for heilårsarbeidsplassar. Den som får driftskontrakt, får gratis nytta næringsdelen av lokalet, på 41 rutemeter, og 30.000 kroner i årleg netto godtgjersle.

Føreslegen frist for å senda kommunen driftskonsept er 18. mars.

Ifølgje framlegget til driftsstandard skal sørvisbygget, bord og benker vera reine, trygge og tilgjengelege. Toalettet skal innby til bruk og reingjerast dagleg før klokka 10. Den som får driftsoppgåva, må mellom anna vaska, fylla på sanitærutstyr, frostsikra og ha kontroll med lysa. Kvart år skal bygget vaskast utvendig før 1. mai. Jondal kommune skal ta seg av vedlikehald og betala for straumen, med unntak av straum til næringsdelen.