Kristin Sande tok gull i noregscup

Kristin Sande i Kvam langrenn- og skiskyttarklubb tok gull på sprinten i klassen for 19 år gamle kvinner i noregscupen i skiskyting på Steinkjer laurdag.

Sande trefte 10 av 10 blinkar og kom i mål 10,2 sekund før nummer to, skriv Kristin Koldal Gjøsæter i ein e-post til HF.

I klassen kvinner 20–21 år kom Malin Auganæs Bergtun på 5. plass med tida 22.27,0. Ho var med det ikkje langt bak Une Kvelvane frå Voss som vart nummer to med tida 22.21,8. Bergtun trefte 9 av 10 blinkar.

Erling Aalvik kom på 11. plass, medan Sindre Gjøsæter enda på 30. plass i sprinten.

Normalprogrammet søndag vart stoppa etter første pulje på grunn av dårleg vêr. I første pulje vart Gjøsæter nummer 15 i klassen menn 18 år.