Kvam kraftverk vert råka av streik

Energimontørane til Kvam kraftverk AS vert tekne ut i streik måndag.

Selskapet er eit av mange som vert råka av ei opptrapping av energistreiken, melder El- og IT-forbundet i ei pressemelding. Frå før av er Hardanger energi AS råka.

– No tek me ut alt og alle. Me har sett oss lei på manglande vilje til å sjå på løysingar som kan enda konflikten, seier tingingsleiar Bjørn Fornes i forbundet.

Ifølgje han kan uttaket få dramatiske følgjer av di alt vedlikehald av straumnettet vert stogga. Feil vert ikkje retta.

– Folk og verksemder kan mista straumen, fortel Fornes, som minner om at det vil verta gjeve dispensasjon frå streiken dersom liv og helse står på spel.

Kjernen i konflikten er avspaseringsordninga til beredskapsvaktene.