Samlar underskrifter til støtte for reformomkamp i Jondal

Kommunestrukturen må drøftast på nytt i Jondal, meiner initiativtakarane til ein underskriftskampanje. Ordføraren har avvist å delta i eit møte med styringsgruppene i Odda og Ullensvang fredag.

Jondal kommune har takka førebels nei til å drøfta meir kommunestruktur med grannane i eit møte i Odda fredag.

– Eg takka nei fordi saklista for møtet var samanslåing mellom Jondal, Ullensvang og Odda. Det ville vera unaturleg for oss å vera med på dette, seier ordførar Jon Larsgard (Sp).

Han understrekar at dette ikkje tyder at Jondal er mot alt hopehav. Ifølgje ordføraren ynskjer Jondal derimot å verta involvert i nært grannesamarbeid på alle aktuelle felt.

Samla underskrifter

Olav Espeland har stilt seg i brodden for eit initiativ til å få reformsaka opp att på ny i Jondal. Tysdag og onsdag gjekk han og to–tre andre – Espeland vil ikkje namngje dei – rundt i Jondal, Herand og på Kysnes og samla underskrifter til støtte for dei partia som ynskjer ein omkamp. Underskriftene er ifølgje Espeland ikkje samla inn som del av eit formelt innbyggjarinitiativ etter kommunelova, men som eit meir uformelt uttrykk for støtte.

Det vart samla inn 167 underskrifter. Desse er sende til gruppeleiarane og ordføraren i Jondal.

Dei 167 har skrive under på følgjande tekst: ”Opprop for å få ny handsaming i Jondal kommunestyre av saka om kommunestruktur i Jondal kommune. Med min signatuyr støttar eg kravet om ny handsaming.”

– KrF ynskte folkevilje

Bakgrunnen for oppropet skal vera at KrF ynskte å få støtte gjennom eit folkeleg engasjement dersom partiet skal støtta H og Ap sitt ynske om å ta kommunestruktursaka opp att på nytt i kommunestyret.

Kommunestyremedlem Otto Galtung (KrF) stadfestar at partiet hans ynskjer at det kjem fram at politikarane i H, Ap og KrF ikkje står åleine i vona om å få saka opp att igjen. Han reknar med at saka kan verta teken opp att 28. september.

Så seint som 8. juni vedtok politikarane med knappast mogeleg fleirtal å seia nei til å slå Jondal saman med Odda og Ullensvang. Ein vararepresentant som melde seg ut av Ap rett før møtet, avgjorde utfallet då den faste Ap-representanten var på jobb i Nordsjøen og ikkje kom seg heim på grunn av tåke. I oversendingsbrevet til ordføraren skriv Espeland at ”framtida til kommunen vert endra på grunn av vêrtilhøve og manglande lojalitet frå vararepresentanten”.

Ville unngå press

Espeland seier at dei som har planlagt og gjennomført aksjonen, ikkje er folkevalde. Kommunestyrerepresentantar og varamedlemer har ikkje skrive under, og dei kunne ha utvida lista monaleg, meiner Espeland. I tillegg har ein del valt å ikkje signera på grunn av til dømes tilsetjingsforhold, fortel han.

Espeland seier signatursamlarane har spurt folk om dei er var nøgde med prosessen som låg bak vedtaket. Mange av dei som uttrykte misnøye, har skrive under på at dei ynskjer saka opp att igjen. Espeland understrekar at han har bede dei som var i tvil, om å ikkje skriva under.

– Me ville ikkje at nokon skulle kjenna seg pressa til å signera. Dei som har signert, skal kunna stå inne for det, seier han.

Han meiner 167 underskrifter på om lag tre timar med innsamling to kveldar vitnar om eit sterkt engasjement. Ein har ikkje hatt kapasitet til å dekkja heile kommunen eller finkjemma for å finna alle. Der dei møtte tomt hus, kom dei ikkje attende for å spørja igjen, fortel Espeland.

Initiativet til underskriftsaksjonen kom tidlegare i sommar, men ein ville venta til etter ferien, fortel Espeland. Han seier han ikkje ynskjer sterk eksponering av kampanjen eller av dei som står bak.

– Dette er ei betent sak som skapar sterke kjensler, men saka er for viktig til å teiast i hel, seier han.

Vil handsama etter lova

Ordførar Larsgard seier at han vil handsama det han har motteke frå Espeland etter lovverket. Han har allereie journalført dokumentet, slik at det vil verta offentleg kjent kven som har skrive under så snart postjournalen vert oppdatert.

Ordføraren meiner oppropet må handsamast som eit innbyggjarinitiativ, sjølv om det ikkje står direkte uttrykt noko ynske om det i oversendingsbrevet. Ordføraren presiserer at det uansett er politikarane som sit med nøkkelen. Dei har makt til å avgjera om reformsaka skal takast opp ein gong til.

– Eg håpar ikkje dette fører til at debatten blussar opp att med full styrke, seier han.

Ifølgje kommunelova krevst signaturar frå minst to prosent eller 300 av innbyggjarane dersom ei sak skal takast opp att. Ei sak med same innhald som har vore drøfta før i same valperioden, kan ikkje takast opp att, men dette er det opp til kommunestyret å vurdera.

Sponheim møter rådet

Oddaordførar Roald Aga Haug (Ap) seier til HF at styringsgruppemøtet i Odda fredag er heilt uforpliktande og at Jondal er hjarteleg velkomen til å vera observatør, om ikkje meir.

Han er kjend med avgjerda til Jondal kommune, men meiner det ville vore uhøfleg å ikkje invitera jondølingane til møtet.

– Det er verdt å merka seg at fylkesmann Lars Sponheim kjem til å vera med på møtet, seier Haug.

– Meiningslaust av Hardangerrådet

Larsgard, som leier Hardangerrådet, har invitert fylkesmann Lars Sponheim til komande rådsmøte 30. august. Temaet er kort og godt lagnaden til alle hardangerkommunane. 13. september har Sponheim invitert alle kommunane i fylket til informasjonsmøte om kommunestrukturen, fortel Larsgard.

Odda-ordførar Roald Aga Haug synest det er meiningslaust at Sponheim er invitert til eit ekstraordinært møte i Hardangerrådet for å diskutera kommunesamanslåing, all den tid rådet tidlegare har vedteke at ein ikkje skal involvera seg i kommunestrukturdiskusjonen. Då fleirtalet – Granvin, Ulvik, Eidfjord og Ullensvang – avgjorde dette, hadde ikkje Jondal, Kvam og Odda noko val, meiner Haug. Han hevdar at Hardangerrådet har spela seg sjølv utanfor sidelina på dette feltet.

Folkerøysting syner at samanslåing med nabokommunar er heilt greitt både for Odda og Ullensvang, framhevar Haug, som synest det er betre for styringsgruppene å møtast enn å diskutera i avisene.

– Jondølingane kan difor koma til Odda fredag heilt på eigne premissar, forsikrar han.

Rådsordførar i Hardangerrådet, Jon Larsgard, påpeikar at reforma har vore tema på fleire hardingting og eit fellesmøte med kommunane. Møtet med Sponheim føyer seg til engasjementet til rådet i saka, meiner han.

Opposisjonen stiller

Gruppeleiar Olav-Magnus Hammer (Ap) kjem til å stilla på møtet i Odda fredag. Han seier til HF at også KrF og H i Jondal vil vera representerte.

– Eg kjenner synet til ordføraren, men er usamd i avgjerda hans. Eigentleg er det uhøfleg å avslå ein invitasjon til eit uforpliktande møte, seier Hammer.

Han meiner møtet er ekstra interessant av di fylkesmann Lars Sponheim kjem. Hammer løyner ikkje at han framleis ynskjer at Jondal skal slutta seg til Odda og Ullensvang, sjølv om folkerøystinga synte noko anna og kommunestyret avgjorde at kommunen skal halda fram åleine.